Azərbaycan, Bakı, 13 dekabr /Trend, müxbir N.İsmayılova/
Yanvar-sentyabr ayları ərzində Azərbaycandan 18,4 milyard dollar məbləğində neft-qaz sektorunun məhsulları ixrac edilib ki, bu da ölkənin ümumi ixracının 95,2 faizini təşkil edir. Bu barədə Azərbaycan Mərkəzi Bankının (AMB) bazar ertəsi yaydığı ödəniş balansında deyilir. 2009-cu ilin analoji dövrü ilə müqayisədə neft-qaz sektoru məhsullarının ixracı 36 faiz artıb.
İxrac edilən neft məhsullarının ümumi həcmindən neft emalı məhsullarının payına 1164,6 milyon dollar düşür, ölkədən xammal neft isə 17,3 milyard dollar məbləğində çıxarılıb. Azərbaycan Beynəlxalq Əməliyyat Şirkəti (ABƏŞ) ixrac edilən neft məhsullarının ümumi həcmindən 16,3 milyard dollar məbləğində məhsul hasil edib. İxrac olunmuş ümumi xam neftin 943,6 milyard dolları isə digər müəssisələr tərəfindən xaricə göndərilib ki, bunun da 87,6 milyon dolları "Şahdəniz" yatağından hasil edilmiş kondensatın, 855,9 milyon dolları isə ARDNŞ-nin payına düşür.
Neft sektorunun payına düşən ixrac edilən məhsulların ümumi dəyəri 974,5 milyon dollar təşkil edib.
