Azərbaycan, Bakı, 14 dekabr /Trend, müxbir Ü.İsmayılova/
Azərbaycanın sığorta şirkətlərinin kapitallaşdırılması ölkənin sığorta bazarının inkişafı üçün müsbət amil olacaq. "Başak-İnam" Azərbaycan-Türkiyə şirkətinin idarə heyəti sədrinin köməkçisi Hikmət Allahverdiyev bu fikirdədir.
"Lakin bazarda sığorta yığımlarının səviyyəsinin nizamnamə kapitalına olan minimal tələbə uyğun olmamasını nəzərə alaraq, Maliyyə Nazirliyinin sığorta və təkrar sığorta şirkətlərinin kapitallaşdırılmasına olan tələbin yumşaldılması üzrə son qərarını düzgün hesab etmək olar", - Allahverdiyev qeyd edib.
Onun sözlərinə görə, Dövlət Sığorta Nəzarəti Xidmətinin kapitallaşdırma səviyyəsinə olan minimal tələbin 500 min manat azaldılması haqqında qərarı sığortaçılara müəyyən güzəştlər verəcək.
Digər tərəfdən, sığorta şirkətlərinin ödənilən nizamnamə kapitalının səviyyəsi sığorta şirkətlkərinin imkanları haqqında təəssürat yaratmamalıdır.
"Vəsaitlər qiymətləndirilərkən əmin olmaq olar ki, onlar Sığorta Nəzarəti Xidməti tərəfindən sığorta şirkətlərinin kapitalının minimal məbləğinin göstəricisinə uyğundur, - Allahverdiyev qeyd edib. - Lakin şirkətlərin səhmdarları sığorta bazarının istifadə edilən potensialı nəzərə alınmaqla, öz vəsaitlərini digər mənbələrdə də qiymətləndirə bilərlər".
"Maliyyə Nazirliyinin qərarını düzgün hesab etmək olar. Biz kapitallaşdırmanın minimal səviyyəsi üzrə tələbin sığorta bazarının istifadə edilən potensialına adekvatlığında maraqlıyıq və güman edirik ki, bu, bütün şirkətlərin marağında olacaq", - Allahverdiyev bildirib.
Azərbaycan Maliyyə Nazirliyi sığorta və təkrar sığorta şirkətlərinin kapitallaşdırılmasına olan minimal tələblərə dəyişikliklər edib. Dəyişikliklərə əsasən, sığorta şirkətlərinin kapitalı 2011-ci il yanvarın 1-nə 3 milyon manat (əvvəllər 3,5 milyon manat), 2012-ci il yanvarın 1-nə isə 4 milyon manat (əvvəllər 5 milyon manat) səviyyəsində təmin edilməlidir.
Sığorta və təkrar sığorta şirkətlərinin kapitallaşdırılmasına minimal tələb haqqında qərar qəbul edilən zaman dünya maliyyə böhranının sığorta və təkrar sığorta şirkətlərinin maliyyə vəziyyətinə təsiri nəzərə alınıb.
"Başak-İnam Sığorta Şirkəti" ASC 1996-cı ildən Azərbaycanın sığorta sektorunda fəaliyyət göstərir. Hazırda şirkətin səhmlərinin 49%-nə dünyanın 15 ölkəsində fəaliyyət göstərən Fransanın və Avropanın ən böyük sığorta şirkətlərindən "Groupama SA"nın Türkiyədəki törəmə şirkəti "Groupama Sigorta A.Ş." sahibdir. Digər 51%-ə isə azərbaycanlı səhmdarlar sahibdirlər. Onlara "TuranBank" ASC, "AzərTürkBank" ASC, "Aqrarkredit" və b. daxildir.
