Azərbaycan, Bakı, 14 dekabr /Trend, müxbir Ü.İsmayılova/
Azərbaycan Nazirlər Kabinetinin qərarı ilə Azərbaycan Milli Elmlər Akademiyasının təsdiqedici sənədi əsasında ölkəyə elmi cihazların və avadanlıqların idxalı əlavə dəyər vergisindən və gömrük rüsumundan azad olunur.
"Bu qərar Azərbaycan Milli Elmlər Akademiyasının İqtisadi İnkişaf, Maliyyə və Vergilər nazirlikləri, Dövlət Gömrük Komitəsi ilə razılaşdırılan təklifi əsasında qəbul edilib", - Nazirlər Kabinetinin qərarında deyilir.
Azərbaycan Nazirlər Kabinetinin qərarı dekabrın 13-dən etibarən qüvvəyə minib və 2016-cı ilin yanvarın 1-dək qüvvədə olacaq.
Azərbaycanda ƏDV dərəcəsi 18 faiz, gömrük rüsumunun maksimal dərəcəsi isə 15 faiz təşkil edir.
