Azərbaycan, Bakı, 17 dekabr /Trend, müxbir E.İsmayılov/
Azərbaycanın "SW Helicopter Services" MMC şirkəti ABŞ-ın "Sikorsky" aviakorporasiyasının istehsalı olan iki S-92A vertolyotu alıb. Bu barədə şirkətin rəsmi internet saytında yerləşdirilən məlumatda deyilir.
"Hər iki vertolyot Zabrat qəsəbəsində yerləşən aeroportda artıq eniş ediblər", - məlumatda qeyd olunur.
Beləliklə, "SW Helicopter Services" postsovet məkanında ofşor əməliyyatlar çərçivəsində uçuşların həyata keçirilməsi üçün bu növ vertolyotlardan istifadə edəcək ilk və yeganə şirkət olacaq.
2010-cu ilin fevralından etibarən "SW Helicopter Services" MMC və "ВР Exploration (Caspian Sea) Limited" aviasiya xidmətlərinin göstərilməsi üzrə birgə işlərə başlayıblar. Bu məqsədlə müvafiq müqavilə imzalanıb.
Hazırda "SW Helicopter Services" MMC BP şirkətinin baş podratçısıdır. Bununla əlaqədar MMC, BP və Kanadanın "CHC Global Operations Canada Inc." arasında müvafiq müqavilələr bağlanıb.
"SW Helicopter Services" MMC Azərbaycan ərazisində aviasiya sahəsində fəaliyyət göstərən ən iri aviaşirkətdir. MMC 18 mart 2008-ci il tarixində hüquqi şəxs kimi qeydiyyatdan keçib və Dövlət Mülki Aviasiya Administrasiyasının verdiyi istismar haqqında şəhadətnamə və lisenziyaya malikdir.
