Azərbaycan, Bakı, 29 dekabr /Trend, müxbir N.İsmayılova/
Azərbaycan Mərkəzi Bankının məlumatına görə, dekabrın 1-nə olan vəziyyətə görə, ölkədə 4210 min ədəd ödəniş kartı olub ki, bu da noyabrdakı göstəricidən 2,6 faiz çoxdur, 2009-cu il noyabrın əvvəlinə olan göstəricini isə 6,96 faiz ötür.
Hesabat dövründə debet kartlar üzrə əməliyyatların ümumi sayı 3 341 ədəd təşkil edib. Debet kartlar üzrə əməliyyatlar 429 milyon manat səviyyəsində olub.
Debet kartlar üzrə əməliyyatların ümumi sayından bankomatlar vasitəsilə 404 milyon manat məbləğində 3 214 min, POS-terminallar vasitəsilə 16 milyon manat məbləğində 62 min əməliyyat yerinə yetirilib.
Noyabrda kredit kartları üzrə ümumi məbləği 57 milyon manat olan 215 min əməliyyat həyata keçirilib.
Kredit kartları üzrə əməliyyatların ümumi sayından bankomatlar vasitəsilə 22 milyon manat məbləğində 87 min, POS-terminallar vasitəsilə 13 milyon manat məbləğində 21 min əməliyyat yerinə yetirilib.
Dekabrın 29-na olan rəsmi məzənnə 0,7983 AZN/USD təşkil edir.