Azərbaycan, Bakı, 29 dekabr /Trend, müxbir E.İsmayılov/
2011-ci ilin əvvəlindən etibarən tenderin qalibi olan İtaliyanın "Todini" şirkəti Ələt-Masallı avtomobil yolunun iki sahəsinin tikintisinə başlayacaq. Bu barədə çərşənbə günü Azərbaycan Nəqliyyat Nazirliyindəki mənbə deyib.
Onun sözlərinə görə, şirkət eyni vaxtda iki sahəni tikəcək, birinci sahə yolun 31-54-cü kilometrliyini, ikincisi isə 55-81-ci kilometrliyini əhatə edir. "Sahələrin ikisində işlər prosesi sürətləndirmək üçün paralel aparılacaq", - mənbə qeyd edib.
Mənbənin sözlərinə görə, yanvardan etibarən Salyan rayonunda Ələt-Masallı yolunun bir hissəsi olan Kür çayı üzərində yeni körpünün tikintisinə başlamaq planlaşdırılır. Yeni körpünün tikintisi Azərbaycanın tikinti şirkəti "Azərkörpü" tərəfindən həyata keçiriləcək.
Mənbənin dediyi kimi, ümumi uzunluğu 143 kilometr olan Ələt-Masallı yolunun tikintisi çərçivəsində işlər Dünya Bankının kredit vəsaitləri hesabına aparılır. Hazırda artıq istifadəyə verilən yolun 9-cu kilometrliyindən 31-ci kilometrliyinə qədər işlər başa çatdırılıb, avtomobil yolunun 9-cu kilometrliyinin tikintisi üzrə işləri hələ ki davam etdirilir.
"Yolun ən böyük sahəsinin - 81-ci kilometrlikdən 143-cü kilometrliyə qədər olan hissəsinin tikintisi üçün podratçı hələ ki müəyyənləşdirilməyib", - mənbə bildirib.
Azərbaycan Nəqliyyat Nazirliyinin məlumatlarına görə, Ələt-Masallı avtomobil yolunun tikintisi layihəsinin ümumi dəyəri 300,1 milyon dollar təşkil edir. Bunun 206,1 milyon dolları Dünya Bankı, 94 milyon dolları isə Azərbaycan hökuməti tərəfindən ayrılıb.
