Azərbaycan, Bakı, 18 yanvar / Trend, müxbir İ.Xəlilova/
Azərbaycan Mərkəzi Bankı (AMB) 2011-ci ildə likvidlik üzrə yeni normativ tətbiq etməyi planlaşdırır. Bu barədə Trend-ə çərşənbə axşamı AMB-nin Kredit təşkilatlarının fəaliyyətinə nəzarət üzrə departamentinin direktoru Rəşad Orucov məlumat verib.
"2010-cu ildə likvidliyin idarə olunması üzrə qaydanı dəyişmişik. Sonuncu dəfə analoji qayda 2000-ci ildə qəbul edilib. Dəyişikliyin vacibliyi, əsas etibarilə AMB-nin likvidliyin idarə olunması üzrə tələblərinin dəyişməsilə bağlıdır", - Orucov bildirib.
Bu gün bank sektoru üçün 30 faiz səviyyəsində ani likvidlik normativi tətbiq edilir. Yeni normativ qısamüddətli likvidliyin tam təmin olunmasını, daha doğrusu aktivlərlə qısamüddətli öhdəliklərin 100 faizlik təmin olunmasını nəzərdə tutur.
"Bu normativ 2011-ci ildə tətbiq olunacaq və biz artıq hazırlıq işlərinə başlamışıq. Bu, həm Mərkəzi Bank, həm də bank cəmiyyəti tərəfindən çox böyük iş tələb edir", - Orucov bildirib.
Bunun üçün vəziyyəti modelləşdirmək və kifayət qədər məlumat bazasına malik olmaq məqsədilə daha keyfiyyətli yanaşma seçimi lazımdır.
"Düşünürük ki, bu normativin tətbiq olunması bank sektorundan kadr hazırlığının yaxşılaşdırılmasını, likvidliyin idarə olunması üzrə daxili modellər nöqteyi-nəzərindən işin yaxşılaşdırılmasını tələb edir", - departament rəhbəri bildirib.
Yaxın vaxtlarda bu məsələ bank cəmiyyətinin müzakirəsinə çıxarılacaq.
"Əgər 2009-cu il - 2010-cu ilin əvvəllərində likvidlik məsələsi ölkənin bank sektoru üçün aktual məsələ idisə, bu gün izafi likvidlikdən səmərəli istifadə məsələsi nisbətən daha ciddi şəkildə qarşıda durur. Yeni normativin tətbiqi gələcəyə doğru yönələn addımdır. Biz müəyyən mərhələdə müəyyən vəziyyətə reaksiya vermək deyil, riskli vəziyyətlərə qabaqcadan hazır olmaq istəyirik", - Orucov bildirib.
