Azərbaycan, Bakı, 20 yanvar /Trend, müxbir E.İsmayılov/
2011-ci ilin ortalarında Dünya Bankı (DB) ilə birgə maliyyələşdirilən Azərbaycanda kapital bazarının inkişafı layihəsinin reallaşdırılmasına başlamaq planlaşdırılır. Bu barədə cümə axşamı Qiymətli Kağızlar üzrə Dövlət Komitəsinin sədri Rüfət Aslanlı deyib.
"Bu günə artıq DB komandası ilə danışıqlar başa çatıb və gözlənilir ki, yaxın üç-dörd ay ərzində Dünya Bankında daxili prosedurlar başa çatacaq, sonradan 2011-ci il ortalarında layihənin həyata keçirilməsinə start veriləcək", - Aslanlı qeyd edib.
Onun sözlərinə görə, bu layihə çərçivəsində xüsusi diqqət növbəti mərhələdə qanunvericilik bazasının təkmilləşdirilməsinə, bazar infrastrukturuna və vahid platforma çərçivəsində qiymətli kağızlarla ticarətin avtomatlaşdırması prosesinin tamamlamasına yönələcək, eləcə də bazarda tələb və təklifin stimullaşdırması üzrə tədbirlər görüləcək.
Dünya Bankının maliyyə proqramının rəhbəri və Cənubi Qafqazda maliyyə məsələləri üzrə əlaqələndiricisi Maykl Edvardsın başçılıq etdiyi missiya yanvarın 11-dən 21-dək Bakıdadır.
Bir müddət əvvəl bankın Bakı nümayəndəliyindən bildirmişdilər ki, Dünya Bankı Azərbaycanda kapital bazarının inkişafına təxminən 5-10 milyon dollar vəsaitin ayrılması imkanlarını nəzərdən keçirir.
Bu layihənin maliyyələşdirilməsinə Beynəlxalq İnkişaf Assosiasiyasının (DB qrupuna daxildir) Azərbaycan üçün 2011-ci maliyyə ilində 73 milyon dollar məbləğində müəyyən edilmiş kvotasından güzəştli kreditin verilməsi mümkündür. İsveçrənin İqtisadi Məsələlər üzrə Dövlət Katibliyi (SECO) də bu layihənin komponentlərindən birini maliyyələşdirəcək və bu gün PAD (Project Appraisal Document) hazırlığı üzrə işlər aparılır. SECO bu layihə çərçivəsində kapital bazarı oyunçularının potensialının möhkəmləndirilməsi və bazar institutlarının inkişafı üçün 1,7 milyon dollar məbləğində texniki yardımın göstərilməsini planlaşdırır.