...

2011-ci ildə Azərbaycanda turistlər üçün qiymətlər 40 faiz azaldılacaq

Biznes və iqtisadiyyat xəbərləri Materials 26 Yanvar 2011 15:44 (UTC +04:00)

Azərbaycan, Bakı, 26 yanvar/Trend, müxbir Ü.İsmayılova/

2011-ci ildə Azərbaycanda "Turizm ili" çərçivəsində real turistlər və turist qrupları üçün qiymətlər 30-40 faiz azaldılacaq. Bu barədə çərşənbə günü Azərbaycan Turizm Assosiasiyasının rəhbəri Nahid Bağırov Trend-ə deyib.

"Turizm Assosiasiyası ölkəyə turist kimi gələn şəxslərə belə güzəştlərin edilməsi üçün hotel biznesinin iştirakçılarına müraciət etmək niyyətindədir. Belə güzəştlər real turistlərə verilə bilər, biznes turisləri üçün hotellərin müəyyənləşdirdiyi qiymət siyasətinə assosiasiya müdaxilə etmək fikrində deyil", - Bağırov bildirib.

Onun sözlərinə görə, assosiasiya real turistlər üçün güzəştlərə nail olmağa çalışacaq, belə ki, turizm xidmətlərinin əlverişli qiymətləri müştəriləri cəlb edir. 2011-ci ildə qiymətlərin azaldılması nəticəsində Azərbaycanda real turistlərin sayı 20 faiz artacaq.

Turistlər üçün aşağı qiymətlərin təqdim edilməsi məsələsi assosiasiyanın ümumi yığıncağı çərçivəsində həll ediləcək. Bağırovun hesab etdiyinə görə, ümumilikdə Turizm Assosiasiyasının və Azərbaycan Hotellər Assosiasiyasının birləşdirilməsi barədə qərar artıq öz bəhrəsini verməyə başlayıb.

Onun sözlərinə görə, iki assosiasiyanın birləşdirilməsinin əsas səbəbi məhz əməkdaşlığın, eləcə də ölkədə turizm sahəsinin inkişafı üçün tərəfdaşlıq münasibətlərinin qurulması olub.

"Əvvəllər turizm bazarının iştirakçıları tərəfdaşlıq münasibətlərini qura bilmirdilər və fikir ayrılıqları var idi. Lakin turizm şirkətləri və hotellər üçün ciddi irəliləyiş olan birləşmədən sonra onlar arasında gərginlik tamamilə aradan qaldırıldı", - Bağırov bildirib.

Ötən ilin oktyabrında AZTA ölkənin Hotellər Assosiasiyası ilə birləşib. Assosiasiyanın gələcək fəaliyyətinin əsası kimi turizm agentliklərinin və hotellərin qarşılıqlı əməkdaşlıq haqqında imzaladıqları memorandum qəbul edilib.

"Azərbaycana turist axının artırılması və turizm şirkətlərinin işinin stimullaşdırılması üçün yerli mehmanxanalar və turizm şirkətləri arasında müqavilənin bağlanması məqsədəuyğundur. Orada mehmanxanalara turizm şirkətləri üçün güzəştli turist qiymətlərinin verilməsi nəzərdə tutulub", - memorandumda deyilir.

Sənədə əsasən, turizm şirkətləri əməkdaşlıq etdikləri hotellərin maraqlarını qorumalı, yerli və xarici sərgilərdə hotellərin reklamını təşkil etməlidirlər. Qarşılıqlı problemlərin həll edilməsi üçün işçi qrupunun yaradılması barədə qərar qəbul edilib.

Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. İdarə heyətinin tərkibinə "Improtex Travel", "Caspian Travel", "Pasha Travel", "Silkway Travel" və "Euroturizm" şirkətlərinin rəhbərləri daxildir.

Xəbər lenti

Xəbər lenti