Bakı. Trend:
Venesuelada baş verən ikiqat zəlzələ nəticəsində həlak olanların sayı 6438 nəfərə yüksəlib. Bu barədə parlamentin sədri Xorxe Rodriqes bazar ertəsi yeni rəsmi məlumat açıqlayıb. Faciədən təxminən iki ay keçməsinə baxmayaraq, xilasedicilər və yaxınları dağıntılar altında hələ də cəsədlərin axtarışını davam etdirirlər.
Əvvəlki rəsmi məlumata görə, avqustun 10-na olan vəziyyətdə ölənlərin sayı 6301 nəfər idi.
İyunun 24-də Venesuelanın sahil bölgəsində, xüsusilə Karakasın şimalındakı La Quayra ştatında baş vermiş 7,2 və 7,5 bal gücündə iki zəlzələ nəticəsində azı 190 bina dağılıb.
Cəsədləri hələ də tapılmayan şəxslər itkin düşmüş hesab edilir. Hökumət indiyədək itkin düşənlərin ümumi sayı ilə bağlı rəsmi statistika açıqlamayıb.
Rəsmilərin məlumatına görə, zəlzələdən zərər çəkmiş təxminən 60 min yaşayış evindən 24 mindən çoxu yaşamaq üçün yararsız vəziyyətə düşüb.
Minlərlə sakin müvəqqəti düşərgələrdə, əksər hallarda ağır şəraitdə yaşayır. Şənbədən bazara keçən gecə yağan güclü yağışlar Karakasdakı bəzi düşərgələrdə zərərçəkənlərin yaşadığı çadırları dağıdıb.
Delsi Rodriqesin rəhbərlik etdiyi müvəqqəti hökumət zərərçəkənlər üçün yeni mənzillər veriləcəyini vəd edib. İndiyədək vəd edilən ilin sonunadək təhvil verilməsi planlaşdırılan 4 min mənzildən 335-i istifadəyə verilib.
