Bakı. Trend:
Azərbaycanın "Azeri Light" markalı neftinin qiyməti İtaliyanın Augusta limanında CIF bazasında əvvəlki göstəricidən 1,24 ABŞ dolları və ya 1,34% ucuzlaşaraq 91,31 ABŞ dollarına enib.
Bu barədə Trend-ə neft bazarındakı mənbə məlumat verib.
Bildirilib ki, Türkiyənin Ceyhan limanında FOB bazasında “Azeri Light” markalı neftin bir barelinin qiyməti 1,16 dollar və ya 1,3% ucuzlaşaraq 88,20 ABŞ dolları təşkil edib.
"URALS" markalı xam neftin qiyməti əvvəlki göstərici ilə müqayisədə 0,4 dollar və ya 0,63% azalaraq 63,08 dollar/barelə bərabər olub.
Şimal dənizində hasil edilən “Dated Brent” markalı neftin bir barelinin qiyməti əvvəlki göstərici ilə müqayisədə 1,9 dollar və ya 2,06% azalaraq 90,16 dollar/barel təşkil edib.
Azərbaycanın 2026-cı il üçün dövlət büdcəsində neftin orta qiyməti 65 ABŞ dolları/barel olaraq hesablanıb.
"Trading Economics"in məlumatına görə, xam neftin qiyməti çərşənbə axşamı bir barel üçün 85 dolları ötüb. Bildirilib ki, bu, neft qiymətlərinin ardıcıl üçüncü sessiyada artmasıdır.
"Artıma ABŞ və İran arasında yeni razılaşmanın əldə olunması perspektivlərinin zəifləməsi səbəb olub. ABŞ Prezidenti Donald Tramp müvəqqəti sülh sazişinin müddətinin uzadılmasında maraqlı olmadığını bildirib.
İyunda imzalanan və tərəflərə uzunmüddətli sülh sazişi üzrə danışıqlar aparmaq üçün 60 gün vaxt verən anlaşma memorandumu bazar ertəsi rəsmi olaraq qüvvədən düşüb.
Bu arada, İran və Oman Hörmüz boğazından gəmiçiliyin idarə olunması ilə bağlı razılaşma üzərində danışıqları davam etdirir. ABŞ bu danışıqlarda iştirak etmir və Vaşinqton strateji əhəmiyyətli bu dəniz marşrutundan gəmilərin sərbəst keçidini təmin etməyən hər hansı razılaşmanı dəstəkləməyə bilər.
Eyni zamanda, Yaxın Şərqdəki neft istehsalçılarının Hörmüz boğazından nefti qlobal alıcılara gizli şəkildə çatdırmaq və mühüm keçid məntəqəsindən kənar ərazilərdən də neft tədarük etmək imkanlarını getdikcə artırdığı bildirilir", - məlumatda qeyd edilib.
