Azərbaycan, Bakı, 2 fevral/Trend, müxbir N.İsmayılova/
Azərbaycan Vergilər Nazirliyi və Niderland Krallığının Vergi Administrasiyası yanvarın 27-də "Azərbaycan Vergilər Nazirliyinə elektron audit sisteminin yaradılması sahəsində dəstəyin göstərilməsi" tvininq layihəsi üzrə iş planını imzalayıblar. Bu barədə nazirliyin "Vergilər" qəzetinə müsahibədə layihə rəhbəri, vergilər nazirinin müşaviri Asəf Əsədov deyib.
Onun sözlərinə görə, tvininq layihə üzrə müqavilə imzalandıqdan sonra Avropa Komissiyası martda layihənin həyata keçirilməsinə start verəcək. Layihənin həyata keçirilməsi müddəti iki il təşkil edir.
Layihə Avropa Komissiyası tərəfindən maliyyələşdirilir və müqavilənin dəyəri bir milyon avro təşkil edir. Bu layihəyə 6 komponent daxildir: elektron auditin tətbiqi üçün lazım olan hüquqi bazanın hazırlanamsı, lazımi proqram təminatının seçilməsi, elektron audit üçün məlumat bazasının yaradılması, metodologiyanın hazırlanması və auditorlar üçün terninqlərin keçirilməsi, orta və iri sahibkarlar tərəfindən tətbiq edilən elektron mühasibatın tətbiqi təcrübəsinin inkişafı, Azərbaycanda elektron audit sisteminin tətbiqi.
Hər bir komponentin həyata keçirilməsi beynəlxalq ekspertlər cəlb edilməklə aparılır.
