Azərbaycan, Bakı, 5 fevral /Trend, müxbir Ü.İsmayılova/
Azərbaycanda həyat sığortası inkişaf etməlidir və "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsindən icbari sığorta haqqında" qanun həyat sığortası şirkətlərinin inkişafı üçün yaxşı stimuldur. Azərbaycan Sığortaçılar Assosiasiyasının Müşahidə Şurasının sədri Azər Əliyev belə hesab edir.
"Təəssüf ki, bu günədək Azərbaycanda həyat sığortasına xüsusi tələbat yoxdur", - Əliyev deyib.
Onun sözlərinə görə, Azərbaycanın sığorta bazarında həyat sığortasının payı təxminən bir faiz təşkil edir. Dünyanın inkişaf etmiş ölkələrində bu göstərici 60 faizə, qeyri-həyat sığortası üzrə isə 40 faizə bərabərdir. Bəzi dövlətlərdə isə bu göstərici hətta 70 faizədək çatır.
Əliyevin sözlərinə görə, Azərbaycanda uzun müddət sığortanın bu növünə tələb olmayıb.
"Həyat sığortası vətəndaşın və onun ailə üzvlərinin maliyyə təhlükəsizliyi üçün gözəl alət və zəmanətdir. Bununla yanaşı, sığortanın bu növü ölkə iqtisadiyyatına müsbət təsir edir, ucuz pulların ciddi həcminin yaranması üçün potensial yaradır", - Əliyev deyib.
Onun fikrincə, bu gün Azərbaycanda həyat sığortasının inkişafı üçün gözəl qanunvericilik bazası mövcuddur. Məsələn, sığortalanmış şəxs minimum üç illik müddətə sığorta müqaviləsi bağlamaqla öz hesablarına təkcə pul deyil, həm də pensiya fonduna bütün sosial ödənişlər daxil olmaqla bu məbləğdən tutulan bütün vergiləri toplayır.
Əliyevin sözlərinə görə, həyat sığortasının inkişafında bu sahədə sığortaçıların özlərinin peşəkarlıq və təhsil səviyyəsi də az rol oynamayacaq. Həyat sığortası polislərini satan şirkətlərin əməkdaşları ilk növbədə həm satıcılar, həm də məsləhətçilər kimi çıxış etməlidirlər.
"Sığortanın bu növü böyük sosial əhəmiyyətə malikdir. Və əgər sığortanın bu növü ilə məşğul olan şirkətlər özlərini düzgün aparmasalar və müqavilə və ya qanunvericiliyin şərtlərini pozmaqla ödənişlər həyata keçirsələr, bu, sosial qeyri-qəanətbəxşliyə gətirib çıxarar, əhalidə mənfi münasibət və inamsızlıq doğura bilər", - Əliyev bildirib.
Azərbaycanda 27 sığorta və bir təkrarsığorta şirkəti fəaliyyət göstərir. Ölkədə yalnız iki şirkət - Atəsgah Həyat və Qala Həyat sırf həyat sığortası ilə məşğul olur.