Azərbaycan, Bakı, 7 fevral /Trend, müxbir İ.Xəlilova/
Bazar ertəsi Beynəlxalq Valyuta Fondunun (BVF) Azərbaycan üzrə missiyasının yeni rəhbəri - Yaxın Şərq və Mərkəzi Asiya Departamentinin (MCD) direktor müavini Nadim İlahinin (Nadeem Ilahi) Bakıya səfəri başlayıb. Bu barədə ölkə hökuməti məlumat verib. Bu vəzifəyə təyin olunanadək İlahi fondun Qırğızıstandakı missiyasına başçılıq edib.
"Səfərdə əsas məqsəd payızda müzakirələri planlaşdırılan BVF sazişinin IV maddəsinin porioritet istiqamətləri ilə yanaşı ölkədəki makroiqtisadi vəziyyət (cari vəziyyət və perspektivlər), valyuta fondunun texniki yardımının alınması üçün istiqamətlərin müzakirə edilməsidir", - hökumətdən deyiblər.
Səfər fevralın 15-dək davam edəcək. Missiyanın səfəri zamanı Maliyyə, İqtisadi İnkişaf nazirliklərində, Mərkəzi Bankda, Dövlət Sosial Müdafiə Fondunda, Dövlət Statistika Komitəsində, Dövlət Gömrük Komitəsində, Qiymətli Kağızlar üzrə Dövlət Komitəsində, ARDNŞ-də, ölkə Parlamentində, beynəlxalq təşkilatların - DB, AYİB, BMK, Deloitte - nümayəndəliklərində görüşlərin keçirilməsi planlaşdırılıb. Eləcə də donorlarla, QHT-lər, yerli banklarda - Azərbaycan Beynəlxalq Bankında, Kapital Bank və Yapi Kredi Bankda, Amerikanın Azərbaycandakı Ticarət Palatasında (AMCHAM) da görüşlərin keçirilməsi nəzərdə tutulub.
Azərbaycan hökuməti artıq altı ildir IV maddə çərçivəsində məsləhətləşmələr səviyyəsində BVF ilə əməkdaşlıq həyata keçirir. Ona görə də səfər zamanı proqram əsasında əməkdaşlığın perspektivlərinə praktiki olaraq toxunulmur.
BVF-nin Azərbaycandakı daimi nümayəndəliyi 1993-cü ildən fəaliyyət göstərir, hökumətlə əməkdaşlığa isə 1992-ci ildən başlanılıb. Beynəlxalq təşkilat ölkəni 1995-ci ildən kreditləşdirməyə başlayıb. Bu günədək BVF respublikaya altı proqram çərçivəsində kredit ayırıb. Azərbaycan 2013-cü ilədək əvvəllər fonddan götürülən kreditlərin ödənilməsini davam etdirəcək.
