Azərbaycan, Bakı, 21 fevral /Trend, müxbir N.İsmayılova/
2010-cu ilin sonuna olan məlumata görə, Azərbaycan Mikromaliyyə Assosiasiyası (AMFA) üzvlərinin aktivlərinin ümumi həcmi 2,5 faiz artaraq 3,68 milyard dollar təşkil edib. Bu göstərici 2009-cu il dekabrın sonuna 3,59 milyard dollar olub. Bu barədə bazar ertəsi Trend-ə AMFA-dan bildiriblər.
Mikromaliyyələşdirmə ilə məşğul olan kredit təşkilatlarının əməkdaşlarının sayı 7 822 nəfərə çatır.
Təşkilatların kredit portfelinin ümumi həcmi ötən ilin sonuna 2,13 milyard dollar təşkil edib. Aktiv müştərilərin sayı 465 982 olub. Risk altında olan (ödəmə müddətini 30 gün ötən) portfelin payı 8,28 faiz təşkil edib. İlin sonuna silinən kreditlərin həcmi 7,49 milyon dollar səviyyəsində olub.
Mikromaliyyələşdirmə portfelinin ümumi həcmi 12,9 faiz artaraq 488,42 milyon dollar olub. Bu göstərici 2010-cu ilin əvvəlində 432,78 milyon dollar təşkil edib. Risk altında olan portfelin payı 3,27 faiz səviyyəsində olub.
Assosiasiyanın mikromaliyyələşdirmə ilə məşğul olan 12 bank və beynəlxalq humantitar təşkilatlar tərəfindən yaradılan 18 bank olmayan kredit təşkilatlarından ibarət 30 üzvü var.
