Azərbaycan, Bakı, 14 mart /Trend, müxbir N.İsmayılova/
Əvvəllər "Ramstore" adlanan "Bazarstore" supermarketlər şəbəkəsi Azərbaycan regionlarında mağazalar açmağı planlaşdırır. Bu barədə jurnalistlərə bazar ertəsi "Bazarstore"un baş direktoru Ruslan Əliyev deyib.
"Hazırda Bakıda "Gənclik" və "Xətai" metrostansiyaları yaxınlığında və Şüvəlanda bu ticarət şəbəkəsinin üç supermarketi fəaliyyət göstərir. İlin sonunadək daha iki mağazanın açılması planlaşdırılır", - Əliyev bildirib.
Onun sözlərinə görə, bir supermarket Bakıda, digəri isə Gəncədə açılacaq.
"Məqsədimiz Azərbaycanın böyük şəhərlərində, xüsusilə, ilk növbədə Gəncədə mağazaların açılmasıdır. Hazırda şirkət əməkdaşlarının sayı 65 nəfərdir, lakin şəbəkənin genişlənməsi səbəbindən müştərilərə keyfiyyətli xidmətin göstərilməsi məqsədilə əməkdaşların sayı da artırılacaq", - o bildirib.
Onun sözlərinə görə, rebrendinq prosesi martın 1-dən başlayıb və gözləntilərə əsasən, ona iki aydan çox vaxt lazım olacaq.
Ticarət şəbəkəsinin brendinin dəyişdirilməsi sahibin dəyişməsi ilə əlaqədardır. Üç supermarketin daxil olduğu Azərbaycanın "Ramstore" MMC-nin 100 faizlik sahibi olan Türkiyənin iri supermarketlər şəbəkəsi "Migros Ticaret" onu fevralda 14,25 milyon dollar məbləğində digər şirkətə satıb.
