Azərbaycan, Bakı, 17 mart /Trend, müxbir Ü.İsmayılova/
Azərbaycanın yeganə təkrarsığorta şirkəti "AzRe Təkrarsığorta"nın təkrarsığortadan əldə etdiyi risklərin payı hələlik o qədər də böyük deyil . Hazırda bu göstərici cəmi bir milyon manat təşkil edir. Bu barədə Şirkətin idarə heyətinin sədri Vüsal Abbasov bildirib.
"Lakin hazırkı tendensiya xarici təkrarsığortanın payının artdığını göstərir", - Abbasov bildirib.
Onun sözlərinə görə, şirkətin strateji məqsədi Azərbaycanın hüdudlarından kənarda risklərin təkrarsığortasının tədricən artırılmasıdır. Lakin bu asan proses deyil, bununla əlaqədar şirkət reytinq almaq üçün beynəlxalq reytinq agentliyinə müraciət etmək fikrindədir. Reytinq şirkətin göstəricisi olacaq və digər bazarlara çıxışını asanlaşdıracaq. Şirkət artıq dünyanın üç aparıcı reytinq agentliyi ilə ilkin danışıqlar aparıb.
"Biz risklərimizin coğrafi diferensiasiyasını maksimum təmin etmək fikrindəyik", - Abbasov bildirib.
Onun sözlərinə görə, "AzRe Təkrarsığorta" Rusiya və digər MDB ölkələrindən, Yaxın Şərq dövlətlərindən, eləcə də Dubaydan, Omandan riskləri təkrar sığortalayır, Hindistandan da risklər alınır.
Hazırda şirkət bu mərhələdə ən azı Şərqi Avropa ölkələrindən risklər almaq üzrə iş aparır. Abbasov deyib ki, bu gün artıq müəyyən sorğular var, lakin şirkət bu ölkələrlə ehtiyatlı siyasət yürüdür.
