Azərbaycan, Bakı, 12 aprel /Trend, müxbir İ.Xəlilova/
Azərbaycan Vergilər Nazirliyi "bir pəncərə" sistemi vasitəsilə "Eksklüziv Siğorta Agentliyi" MMC-ni qeydiyyata alıb. Bu barədə nazirliyin rəsmi saytının "bir pəncərə" bölməsində deyilir.
Sığorta agentliyinin həmtəsisçisi qismində iki fiziki şəxs - Quliyev Rəşad Fərhad oğlu və Quliyev Fərhad İlqar oğlu çıxış edir. Agentliyin rəsmi nümayəndəsi Hacızadə Fariz təyin edilib.
Agentliyin nizamnamə kapitalı 90 manatdır.
MMC dövlət qeydiyyatından martın 7-də keçib.
Hazırda ölkədə 2010-cu ilin ortalarında yaradılan "Qarant Sığorta"nın öz agent şirkəti "Qarant Sığorta Agenti" fəaliyyət göstərir. "Qarant Sığorta Agenti"nin yaradılmasının əsas məqsədi əhali arasında sığorta mədəniyyətinin yaradılması, istehlakçılara daha yaxın olmaq, pərakəndə sığorta biznesinin genişləndirilməsi, Bakı və regionlarda filial şəbəkələrinin genişləndirilməsi, yeni iş yerlərinin açılması, gənclərə sığorta sahəsində karyera qurmaq imkanının yaradılmasıdır.
2011-ci ilin əvvəlində "AXA MBASK" sığorta şirkəti, pərakəndə satışın sığorta agentlikləri şəbəkəsi vasitəsi ilə inkişaf etdirilməsi planına müvafiq olaraq, "Xəzər" agentliyi ilə özünün tərəf-müqabillik haqqında ilk sazişini bağlayıb.
Beləliklə, "Xəzər" agentliyi, АХА MBASK-ın tam dəstəyi ilə açılmış ilk agentlik olub. Agentliyin fəaliyyəti fiziki hüquqi şəxslərlə, habelə maliyyə-kredit müəssisələri ilə sığorta olunmanın bütün növləri üzrə işə istiqamətlənəcək.
Beynəlxalq təcrübə göstərir ki, agentlərsiz və agentliklərsiz pərakəndə satışın inkişafı praktiki olaraq, mümkün deyildir. Bununla əlaqədar, AXA MBASK şirkətdə pərakəndə satış modelini tamamilə yenidən qurub və bu modeldə ən böyük rolu məhz sığorta agentlikləri oynayacaqlar. AXA MBASK, agent fəaliyyəti ilə məşğul olmaq istəyən yerli sahibkarları tam mənada dəstəkləməyə hazırdır.
Ölkədə sığorta olunmanın inkişaf etməsi ilə, agent fəaliyyəti get-gedə daha sərfəli biznesə çevrilir. Agentliyinin fəaliyyətinin prioritet istiqamətləri müştərilərlə kommunikasiyanın səmərəlilik səviyyəsinin daha da yüksəldilməsi, agent satışlarının yüksək səviyyəsini əldə etməyə imkan verən sistemin qurulması olacaq.
Aprelin 12-nə olan rəsmi məzənnə 0,792 AZN/USD təşkil edir.