Bakı.Trend:
"PASHA Holding" təkcə Azərbaycanda deyil, bütün regionda startaplar axtarır və onları portfelindəki şirkətlərin konkret ehtiyaclarına uyğun seçir.
Bunu "PASHA Financial Holding"in innovasiyalar istiqamətinin rəhbəri Tuğra Musayeva cümə axşamı Bakıda keçirilən CAMCA 2026 Regional Forumunda “Regional Synergies: Designing the Next Digital Silk Road” sessiyasında çıxışı zamanı deyib.
Onun sözlərinə görə, qrup daxilində holdinq şirkətlərinin startaplarla əməkdaşlıq etdiyi və texnoloji həlləri pilot layihələr vasitəsilə tətbiq etdiyi proqram fəaliyyət göstərir. Bir şirkətdə uğurlu nəticə verən pilot digər qrup şirkətləri üçün tövsiyəyə çevrilir.
“Biz bank sektoru, sığorta, elektron ticarət və digər istiqamətlərdə şirkətlərimizin ehtiyaclarına uyğun regiondakı startapları seçirik. Bir şirkətdə pilot uğurla həyata keçirildikdə, həll digər qrup şirkətlərinə də təqdim olunur. Onlar bir-birinin təcrübəsinə güvənirlər: bir şirkətdə işləyən həllin digər şirkətə də kömək etməsi ehtimalı yüksəkdir. Bu gün qrup daxilində bu, artıq adi praktikaya çevrilib”, – T. Musayeva deyib.
“Yerli bazar kifayət etmir, ona görə də biz həlləri regional səviyyədə axtarırıq. Bu, startap üçün əldə edilməsi ən çətin imkanlardan birini – yeni bazarda ilk müştərini qazanmaq imkanını yaradır. Yeni ölkəyə daxil olmaq, sıfırdan əlaqələr qurmaq və ilk müştərini tapmaq üçün bir il vaxt sərf etmək əvəzinə, startap bizim qrup vasitəsilə bazara çıxış əldə edir”, – deyə o qeyd edib.
İnvestisiyalar: "INMerge VC"nin regional portfeli
İnvestisiyalardan danışan T. Musayeva bu ilin yanvarında investisiya fəaliyyətinə başlayan INMerge VC vençur fondunun fəaliyyəti barədə məlumat verib. Onun sözlərinə görə, fond bu günədək altı investisiya həyata keçirib və portfel ilk gündən regional xarakter daşıyıb: portfeldə Azərbaycan, Özbəkistan, Qazaxıstan, Gürcüstan və Türkiyədən olan startaplar yer alır.
“Biz yerli deyil, regional problemləri həll edən təsisçilərin sayının getdikcə artdığını görürük. Regionun üstünlüyü ondan ibarətdir ki, problemlər çox oxşardır: ödənişlər və pul köçürmələri, kiçik biznesin kreditləşdirilməsi, müştərilərin rəqəmsal maliyyə xidmətlərinə qoşulması. Əgər təsisçi asanlıqla miqyaslana bilən texniki həll tapıbsa və məsələn, Özbəkistandan Azərbaycana çıxmaq üçün məhsulu sıfırdan yaratmağa ehtiyacı yoxdursa, biz dərhal maraq göstəririk”, – T. Musayeva bildirib.
Onun sözlərinə görə, INMerge startaplara kapitaldan daha çox imkan verə bilər: pilot layihə, ilk müştəri və qrup şirkətləri vasitəsilə Azərbaycan bazarına çıxış.
INMerge regional platforma kimi
T. Musayeva həmçinin "PASHA Holding"in dövlət qurumları, korporasiyalar, startaplar və Qafqaz, Mərkəzi Asiya və qonşu regionların investorları üçün regional platforma kimi inkişaf etdirdiyi INMerge Innovation Summit-in rolundan danışıb.
Onun sözlərinə görə, "INMerge" Azərbaycanın hüdudlarından kənara çıxıb: tədbirlər İstanbul, Daşkənd və Berlində keçirilib. Əsas sammit 30 noyabr – 1 dekabr 2026-cı il tarixlərində Bakıda keçiriləcək.
“INMerge regionda innovasiyalara olan tələbin təkliflə bir araya gəldiyi məkandır. Regionun iri şirkətləri indiyədək startapları ayrı-ayrılıqda, hər biri öz ölkəsində axtarırdı. Biz istəyirik ki, onlar öz problemlərini paylaşsın, bir-birinin pilot layihələrini tanısın və birlikdə investisiya qoysunlar”, – deyə o bildirib.
T. Musayeva vurğulayıb ki, startapın regional miqyasda genişlənməsi təkcə onun texnologiyasının miqyaslana bilməsi ilə bağlı deyil. “Startap ekosistem növbəti bazara çıxışın xərclərini azaltdıqda regional miqyasda genişlənir. Məqsəd sadəcə ölkələrimizi rəqəmsal kanallarla birləşdirmək deyil, regionun innovasiyalar üçün vahid bazar kimi fəaliyyət göstərməsinə nail olmaqdır”.
