Azərbaycan, Bakı, 12 aprel /Trend, müxbir A.Axundov/
Yaxın illərdə Azərbaycanda iqtisadiyyata dövlət investisiyalarının indiki səviyyəsinin saxlanmasına ehtiyac qalacaq. Bu barədə çərşənbə axşamı maliyyə nazirinin müavini Azər Bayramov bildirib.
"Bununla yanaşı, dövlət investisiyalarının həcminin kəskin artırılması da düzgün olmazdı", - Bayramov bildirib.
2011-ci ildə iqtisadiyyata investisiyalar 11,4 milyard manat səviyyəsində proqnozlaşdırılır ki, bu da 2010-cu ilə nisbətən 17 faiz artım təşkil edir.
Yaxın üç ildə Azərbaycan iqtisadiyyatına kapital qoyuluşları 37 milyard manat təşkil edəcək.
2011-ci ildə xarici investisiyaların 4 milyard manat səviyyəsində olacağı, sonrakı üç ildə isə orta hesabla 10,6 faiz artaraq 16 milyard manatа çatacağı gözlənilir.
Bu il dövlət investisiyaları 5,9 milyard manat, qeyri-dövlət investisiyaları isə 5,5 milyard manat həcmində gözlənilir. Neft sektoruna qoyuluşlar 4 milyard manat, qeyri-neft sektoruna isə 7,4 milyard manat həcmində gözlənilir.
Bayramovun sözlərinə görə, gözlənilir ki, 2011-ci ildə də neft gəlirlərindən yüksək səviyyədə istifadə olunacaq. Bu, hələlik imtina edilməsi mümkün olmayan fəal infrastruktur xərclərlə bağlıdır. Çünki köhnə və geridə qalmış infrastruktur bazasında inkişafa nail olmaq mümkün deyil.
"Azərbaycan faktiki olaraq, 10 il ərzində neft gəlirlərindən aktiv istifadə olunması hesabına infrastrukturu modernləşdirən, daha sonra belə xərclərin kəskin şəkildə məhdudlaşdırılmasına keçən Norveçin yolu ilə gedir. Azərbaycanın Dövlət Neft Fondu 10 il əvvəl yaradılıb, lakin aktiv investisiyalarla azı 7 ildir məşğul olur", - nazir müavini bildirib.
Onun sözlərinə görə, qeyri-neft gəlirləri hesabına dövlət büdcəsinin cari xərclərinin yerinin doldurulması fundamental və icrasına görə mürəkkəbdir.
"Bu kifayət qədər iddialı məsələdir, həmin sadə səbəbdən ki, bizdə sabah cari xərcləri ardınca aparacaq infrastruktur layihələri çox güclü şəkildə artır. Ona görə də, hesab edirəm ki, bu məqsədlərə çatmaq nisbətən daha prioritet vəzifədir", - Bayramov bildirib.
Onun sözlərinə görə, bunun nəticəsində istənilən anda hansısa investisiya layihəsini dövlət investisiyalarından ayıraraq, onları kredit pullarına və ya özəl bazara keçirmək mümkündür. Çünki əsas infrastruktur hazır olandan sonra özəl sektor daha inamla bazara daxil olacaq.
Aprelin 12 -nə rəsmi məzənnə 0,792 AZN/USD təşkil edir.
