Azərbaycan, Bakı, 12 aprel /Trend, müxbir A.Axundov/
Azərbaycanda soyuducu-anbar komplekslərinin tikintisinə ehtiyac var. Bu barədə kənd təsərrüfatı nazirinin müavini Bəhram Əliyev deyib.
"Məsələn, Azərbaycanın Quba-Xaçmaz regionunda əsasən alma və armud yetişdirilir. Yığım mövsümündə bazara bütün məhsul tədarük edilən zaman onların qiyməti xeyli aşağı düşür, qışda isə təklif azalır", - Əliyev bildirib.
Onun sözlərinə görə, soyuducu-anbar kompleksləri belə məhsulu il boyunca satmağa imkan verir, buna görə onların Azərbaycanda tikilməsi vacibdir.
Kənd təsərrüfatı nazirinin müavinin sözlərinə görə, ölkədə soyuducu-anbar komplekslərinin tikintisini İqtisadi İnkişaf Nazirliyi aparır.
Bir müddət əvvəl Azərbaycan İqtisadi İnkişaf Nazirliyininin Sahibkarlığa Kömək Milli Fondunun icraçı direktoru Şirzad Abdullayevin dediyinə görə, hazırda Azərbaycanda 12 soyuducu-anbar kompleksi istismara verilib və daha 15-nin tikintisi davam etdirilir.
Abdullayevin sözlərinə görə, bu komplekslərin ümumi gücü 95,5 min ton təşkil edir.
"İlkin məlumatlara görə, biz meyvə və tərəvəzlərin saxlanması üçün istifadə edilən soyuducu-anbar komplekslərinin tikintisini müsbət qiymətləndiririk. Hazırda müəyyən xüsusiyyətli, daha dəqiq desək, soğan, kartof və ayrı-ayrılıqda müxtəlif tərəvəzlərin saxlanması üzrə komplekslərin tikintisinə maraq müşahidə edilir", - Abdulayev bildirib.
Hazırda SKMF-yə Gədəbəy, Bərdə, Beyləqan və Tərtər rayonlarının sahibkarlarından xüsusiləşdirilmiş komplekslərin tikintisi ilə bağlı 5 müraciət daxil olub.
Abdullayevin fikrincə, komplekslərin tikintisi kənd təsərrüfatı sahəsində itkiləri minimuma endirməyə və şəxsi istehsal sayəsində daxili bazarın tələbatını ödəməyə imkan verəcək. Belə ki, bu soyuducu-anbar komplekslərində məhsulun uzun müddət saxlanması mümkündür.