Azərbaycan, Bakı, 19 aprel /Trend, müxbir A.Axundov/
"GUAM-Yaponiya" birgə turizm məhsulu xarici turistlərin Azərbaycana axınını artıracaq. Bu barədə çərşənbə axşamı Azərbaycan Turizm Assosiasiyasının rəhbəri Nahid Bağırov bildirib.
2011-ci il aprelin 14-də Tbilisidə GUAM-ın turizm üzrə işçi qrupunun doqquzuncu iclası keçirilib. İclasın gedişində Yaponiya ilə GUAM birgə turizm məhsulunun inkişafı məsələləri, habelə Yaponiyanın turizm şirkətləri və KİV nümayəndələri üçün press-turların təşkili müzakirə olunub. İclasın yekunları üzrə GUAM-a üzv ölkələrin turizmin inkişafına cavabdeh olan idarələrinin rəhbərlərinin Tbilisi bəyannaməsi qəbul edilib və "GUAM-Yaponiya" birgə turizm məhsulunun inkişafı üzrə yeni fəaliyyət planı təsdiqlənib.
"İclasda Azərbaycandakı turizmə böyük maraq müşahidə olundu. Bu məhsul yapon turistlərin ölkəyə axınını artıracaq", - Bağırov bildirib.
Onun sözlərinə görə, cari turizm mövsümündə Azərbaycana xarici turistlərin axınının 20-30 faiz səviyyəsində olacağı proqnozlaşdırılır.
2010-cu ildə Azərbaycana gələn xarici turistlərin sayı 1,85 milyon nəfər təşkil edib. 2006-cı ilə nisbətən bu göstərici 1,6 dəfə artıb.
Son beş il ərzində Azərbaycanda turizm şirkətlərinin sayı 214-dək, 2005-ci illə müqayisədə mehmanxana və mehmanxana tipli obyektlərin sayı 262-dən 477-dək artıb. Onların 80 faizi ölkənin regionlarında yerləşir.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. Ötən ilin oktyabrında Azərbaycanın turizm və mehmanxana assosiasiyaları birləşdirilib.
