Azərbaycan, Bakı, 25 aprel /Trend, müxbir N.İsmayılova/
Azərbaycan, Gürcüstan və Türkiyə yayda birgə biznes forumunun keçirilməsi imkanını müzakirə edirlər. Bunu bazar ertəsi Azərbaycanda birgünlük səfərdə olan Gürcüstanın iqtisadiyyat və davamlı inkişaf naziri xanım Vera Kobaliya Trend-ə müsahibəsində bilidirib.
"Biz bu məsələni bu gün Azərbaycanın İqtisadi İnkişaf naziri ilə müzakirə etmişdik. Bu Azərbaycan, Gürcüstan və Türkiyənin birgə biznes forumu olacaqdır. Forum zamanı əməkdaşlığın konkret istiqamətlərini və üç ölkənin imkanlarını müzakirə etmək fürsəti olacaq", - Kobaliya deyib.
Onun sözlərinə görə, sözügedən forum turizm, kənd təsərrüfatı, nəqliyyat və energetika kimi sahələrdə əməkdaşlıq qurmaq məqsədi ilə danışıqlar keçirməyə imkan verəcək.
"Artıq Türkiyə tərəfindən təklif gəlib və ümidvarıq ki, yayın ortalarında dəqiq tarix və yerini seçib toplaşmaq və konkret layihələri müzakirə etmək mümkün olacaq" deyə Kobaliya bildirib.
Azərbaycanla Gürcüstan arasında əməkdaşlığına toxunan Kobaliya bildirib ki, Gürcüstan üçün iqtisadiyyatının maksimal diversifikasiyası çox əhəmiyyətlidir və ölkələrin birgə işləyəcəyi layihələr bütün istiqamətlərə toxunacaqlar.
"Regionumuzda konkret nəticələrə nail olmaq üçün ölkələr arasında sıx əməkdaşlıq vacibdir" deyə o bildirib.
Onun sözlərinə görə, Azərbaycan Gürcüstanın ən iri ticarət partnyorlarından biridir və bu göstərici üzrə Türkiyədən sonra ikinci yeri tutur.
"[Bazar ertəsi Bakıda keçirilən] Azərbaycanın nəqliyyat, iqtisadi inkişaf, mədəniyyət və turizm nazirləri ilə görüşlərimin çərçivəsində hamımız qeyd etmişdik ki, bu gün Azərbaycanla Gürcüstan arasında mövcud olan münasibətlər həm siyasi, həm də iqtisadi baxımından möhkəmdirlər. Gürcüstanda təxminən 200-ə yaxın Azərbaycan şirkəti fəaliyyət göstərir. Onların fəaliyyət spektri nəqliyyatdan tutmuş turizm sektoruna kimi əhatə edir. Artım üçün imkanlar mövcuddur", deyə nazir bildirib.
