Azərbaycan, Bakı, 27 aprel /Trend, müxbir A.Axundov/
Azərbaycanın turizm şirkətləri və mehmanxanalarının göstərdiyi xidmətin aşağı səviyyəsi ölkənin turizm sektorunun ən böyük problemi olaraq qalmaqdadır. Trend-in məlumatına görə, bu barədə çərşənbə günü jurnalsitlərə Azərbaycan Mədəniyyət və Turizm Nazirliyinin Turizm departamentinin rəhbəri Aydın İsmiyev deyib.
"Biz hər il treninqlər keçiririk, lakin 6000 nəfəri yüksək səviyyəli iş üçün hazırlamaq çətindir. 2006-cı ildə Turizm İnstitutu açılıb, 2010-cu ildə ilk buraxılışı olub. Bu sahədə xidmət göstərən heyətin hazırlanması üçün peşə təhsili məktəbləri və digər təhsil müəssisələri lazımdır", - İsmiyev bildirib.
Onun sözlərinə görə, mayda Türkiyə Mədəniyyət və Turizm Nazirliyinin altı eksperti turizm sahəsində işləyən şəxslərə treninqlər keçmək üçün Azərbaycana gələcək.
"May ayı ərzində bu treninqlərdə təxminən 600 nəfər iştirak edəcək", - İsmiyev qeyd edib.
İsmiyevin sözlərinə görə, Azərbaycandakı turizm xidmətlərinin qiymətlərini Türkiyə və BƏƏ-dəki qiymətlərlə müqayisə etmək düzgün deyil. Belə ki, bu ölkələrdə turizm sahəsi Azərbaycandakından daha çox qədimdir.
"Bizdə turizm sektoru 6-7 il əvvəl, Türkiyədə isə ötən əsrin 60-cı illərdən inkişaf etməyə başlayıb", - İsmiyev əlavə edib.
Onun sözlərinə görə, mehmanxanaların sayı artdıqca xidmətlərin qiyməti aşağı düşəcək.
"Yayda Azərbaycan regionlarında istirahət üçün boş yerlərdə çatışmazlıq müşahidə olunur. Buna görə də qiymətlər aşağı düşmür. Lakin Azərbaycanda hotellərin sayı artır. İndi onların sayı 500-dür, bu il bir neçə mehmanxana brendinin açılacağı gözlənilir. Ölkədə iqtisadiyyat bazar prinsipləri üzrə inkişaf edir və dövlət qiymət məsələsinə müdaxilə edə bilməz", - İsmiyev vurğulayıb.
