Azərbaycan, Bakı, 28 aprel /Trend, müxbir N.İsmayılova/
ABŞ Beynəlxalq İnkişaf Agentliyi (USAID) illik dövriyyəsi 500 min manatdan artıq olmayan müəssisələr üçün ƏDV-nin ödəniş müddətinin bir aydan iki ayadək artırılmasını təklif edir. Trend-in məlumatına görə, bu barədə agentliyin eksperti Miç Muxtari aprelin 28-də Azərbaycandakı Amerika Ticarət Palatasının (AmCham) təşkil etdiyi "Doğru yol axtarışında" adlı vergilər üzrə birinci konfransda deyib.
"USAID Azərbaycanda dörd istiqamət üzrə vegi sisteminin təkmilləşdirilməsini təklif edir: ƏDV-nin ödənişi, sadələşdirilmiş vergi, mənfəət vergisi və vergi inzibatçılığının yaxşılaşdırılması" , - Muxtari bildirib.
USAID habelə respublikada fəaliyyət göstərdikləri dövrdə qeyri-rezidentlərin əldə etdikləri gəlirdən ödədikləri mənbədən verginin 10 faiz məbləğində azaldılmasını da təklif edir.
Onun sözlərinə görə, Azərbaycan qanunvericiliyinə uyğun olaraq illik dövriyyəsi 90 min manatdan yuxarı olmayan fiziki şəxslərin ödədikləri sadələşdirilmiş verginin əlverişli səviyyədə olduğu hesab edilir.
"Biz hüquqi şəxslər üçün ildə 150 min manat təşkil edən sadələşdirilmiş vergi həddinin azaldılmasını təklif edirik", - o deyib.
Aprelin 28-nə olan rəsmi məzənnə 0,7914 AZN/USD təşkil edir.