Azərbaycan, Bakı, 29 aprel /Trend, müxbir İ.Xəlilova/
Azərbaycanın su sektorunda cari layihələrin icmalının aparılması üçün Asiya İnkişaf Bankının (AİB) missiyası mayın 3-dən 9-dək Bakıda olacaq. Bu barədə bankın Bakı nümayəndəliyindən məlumat verilib.
Hazırda Asiya bankı Azərbaycanda su təchizatı sistemlərinin və sanitar xidmətlərin yaxşılaşdırılması üzrə iki layihəni maliyyələşdirir.
Göyçay və Naxçıvanda su təchizatı və sanitar xidmətlər sisteminin yaxşılaşdırılması üzrə layihənin ilkin dəyəri 39,9 milyon dollar təşkil edib. Layihənin maliyyələşdirilməsi üçün Asiya bankı ilkin olaraq 30 milyon dollar kredit ayırıb, 9,9 milyon dollar isə ölkə hökumətinin payına düşüb. İki rayonda işlərin tam əhatə olunması üçün bank multitranş maliyyələşdirmə (MFF) vəsaitləri hesabına 75 milyon dollar (birinci tranş), Azərbaycan hökuməti isə 25 milyon dollar ayırıb. MFF-nin ilk tranşı AİB-in adi kredit resurslarından ayrılıb: illik libor + 0,2 faiz dərəcə üzrə dörd il güzəştli dövr olmaqla 24 il müddətinə.
İlk tranşın vəsaitləri beş il əvvəl təsdiqlənmiş Ağdaş, Göyçay və Naxçıvanda su təchizatı sisteminin və sanitar xidmətlərin yaxşılaşdırılması üzrə layihənin bahalaşması ilə əlaqədar əlavə xərclərin ödənilməsi üçün nəzərdə tutulub. Bu layihənin dizaynı 2004-cü ildə hazırlanıb. Bu müddətdə tikinti materiallarının, əsasən də kanalizasiya materiallarının qiymətləri xeyli qalxıb və xərclərin artması müşahidə olunur. Azərbaycan tərəfinin təklifi ilə layihədə nəzərdə tutulan rayonlarda kanalizasiya sistemində müasir qurğuların qurulması da onun qiymətinə təsir göstərir. AİB-in layihəsində seçilmiş rayonlarda su təchizatının və kanalizasiyaların tam bərpası nəzərdə tutulur.
Layihənin əhatəsini genişləndirmək üçün AİB 350 milyon dollar məbləğində MFF-nin ikinci tranşını ayırmağa hazır olduğunu bildirib. Bu vəsaitlər Ağdaş, Ağcabədi, Beyləqan və Balakəndə su təchizatı sisteminin və sanitar xidmətlərin yaxşılaşdırılması üçün nəzərdə tutulub.
Naxçıvanda tikinti işləri üçün "Gəmi Qaya" şirkəti podratçı seçilib, bu rayonda layihənin icraçısı isə NMR Dövlət Meliorasiya və Su Təsərrüfatı Komitəsidir. Keçirilən uğursuz tenderdən sonra Göyçay üçün su təchizatı sistemlərinin və sanitar xidmətlərin yaxşılaşdırılması üzrə işlərin həyata keçirilməsi üçün yeni smeta hazırlanıb, həmin sənədə görə, xərclər yenidən hesablanıb. "Azərsu" ASC tərəfindən keçirilən tender çərçivəsində podratçı şirkətlər tərəfindən təklif olunan qiymətlərə görə, xərclər real qiymətləri 100 faiz üstələyib. Bununla əlaqədar qiymətlərə yenidən baxılmaq üçün yeni xərclər smetasının hazırlanması zərurəti meydana çıxıb. Bu da Asiya bankı tərəfindən cəlb olunan məsləhətçi tərəfindən həyata keçirilib. Tender proseduruna hazırlıq prosesi AİB-in missiyası ilə müzakirə olunacaq Əlavə tenderin mayın birinci yarısında elan olunacağı gözlənilir.
Su təchizatı və kanalizasiya sahəsində aydın strategiya və islahatlar proqramı ilə dəstəklənən mərhələli investisiyalar nəzərə alınmaqla, multitranş maliyyələşməsi AİB və Azərbaycan hökuməti arasında səkkizillik əməkdaşlıq üçün əsas olacaq.
MFF-nin Azərbaycanın su təsərrüfatı üçün maliyyələşməsinin ümumi həcmi 2009-cu ilin sentyabrında Asiya İnkişaf Bankının Direktorlar Şurasında 600 milyon dollar həcmi ilə bəyənilib.
"Azərsu" SC-nin su layihəsi üzrə məsləhətçisi "AICO Consulting Ltd/European Consultans Organization" konsorsiumudur.
