Azərbaycan, Bakı, 13 may /Trend, müxbir A.Axundov/
Azərbaycanın sığorta şirkəti "Qarant Sığorta" hazırda qiymətli kağızlara 1 milyon manatdan çox investisiya yatırıb. Bu barədə Trend-ə müsahibəsində şirkətin idarə heyətinin sədri Vaqif Həsənov deyib.
"Qarant Sığorta" şirkəti qiymətli kağızlara 1 milyon manatdan bir qədər çox investisiya yatırıb. Biz bunu broker şirkətləri vasitəsilə etmişik, lakin hazırda öz broker şirkətimizin yaardılması ilə bağlı müraciət etmişik", - Həsənov bildirib.
Onun sözlərinə görə, indi bu fəaliyyət növü üçün lisenziyanın alınması məqsədilə sənədlərin yığılması üzrə iş aparılır. Şirkət ayın sonuna hazır olacaq.
"Qiymətli kağızlar bazarı çox sərbəstdir və lazımi qədər peşəkar deyil. Güman edirəm ki, bu, gələcəyin şirkətidir və onun indi yaradılması və bu bazarın öyrənilməsi gələcəkdə öz səmərəsini verəcək", - Həsənov vurğulayıb.
Həsənovun sözlərinə görə, şirkət "Qarant Capital" adlandırılacaq.
"Qarant Sığorta" şirkəti öz faktiki fəaliyyətinə 2008-ci ilin əvvəlindən başlayıb. "Qarant Sığorta" ZQAN Holdinqin tərkibinə daxildir.
