Azərbaycan, Bakı, 26 may /Trend, müxbir A.Axundov/
Apreldə Bakıda bir sot torpağın orta qiyməti 0,8 faiz azalaraq 14227 dollardan 14096 dollara çatıb. Bu barədə cümə axşamı "Əmlak Bazarı İştirakçıları" İctimai Birliyindən bildirilib.
Torpaq bazarında qiymətlər indeksi ay ərzində 240,1-dən 237,9 bəndədək azalıb.
"Bakının torpaq bazarında qiymətlərin azalmasının əsas səbəbi tələbatın kəskin azalmasıdır", - məlumatda deyilir.
Apreldə qiymətlərin ən yüksək artımı Qaradağ rayonunda - 0,5 faiz müşahidə edilib. Əhəmiyyətli azalma isə Xətai rayonunda - 1,3 faiz qeydə alınıb. Torpaq bazarında daha fəal Binəqədi və Xətai rayonları olub. Ən passiv rayon isə Nərimanov rayonu olub.
Apreldə ən bahalı torpaq sahəsi Bakının Nəsimi rayonunda bir sot üçün 250 min dollara, ən ucuzu Abşeron rayonunda (Pirküşkül qəsəbəsində) bir sot üçün 350 dollara təklif olunub.
Apreldə Bakının torpaq bazarı üçün 781,3 hektar torpaq təklif edilib. Bunun 78,2 faizi boş sahələr təşkil edib, qalanı qeyri-yaşayış və köhnə ərazilərin payına düşür.
Bazarda torpağın ekspozisiya müddəti əvvəlki aya nisbətdə 0,8 faiz artıb.
