Azərbaycan, Bakı, 3 iyun /Trend, müxbir N.İsmayılova/
"PriceWaterhouseCoopers, Salans, Rothschild" konsorsiumu Azərbaycan Beynəlxalq Bankının (ABB) özəlləşdirilməsi və onun kapitalında dövlətin payının azaldılması (dövlətsizləşdirmə) prosesi üzrə xidmətlərin göstərilməsi ilə bağlı ən yaxşı məsləhətçi seçilib. Bu barədə cümə günü Trend-ə ABB idarə heyətinin sədri Cahangir Hacıyev bildirib.
"Konsorsium ABB-nin özəlləşdirilməsində müşavir və məsləhətçi rolunda çıxış edirlər və onların fəaliyyətinin yekunu üzrə bankın dövlətsizləşdirmə layihəsi işlənib hazırlanacaq", - Hacıyev deyib.
Onun sözlərinə görə, ABB səhmlərin əlavə emissiyası, IPO və digər üsullarla qismən, yaxud tam özəlləşdiriləcək.
Hacıyev bildirib ki, ilin sonunadək məsləhətçilərin bankın özəlləşdirmə planını hazırlayacaqları gözlənilir.
Üç auditor şirkəti - "PriceWaterhouseCoopers", "Ernst & Young" və İngiltərənin bir auditor şirkəti tenderdə iştirak etmək imkanı əldə edib. "Deloitte" şirkəti ABB-nin auditoru olduğuna görə öz ərizəsini geri götürüb.
Hazırda "Deloitte" auditor şirkəti ABB-nin 2010-cu ildəki fəaliyyətinin yekunları üzrə hesabat hazırlayır.
Ötən ili ABB 5 527,92 milyon manatlıq aktivlərlə başa vurub ki, bu da 2009-cu ilin müvafiq dövr göstəricisindən 8,99 faiz çoxdur.
ABB yarıdövlət bankıdır və hazırda onun başlıca səhmdarı Azərbaycan hökumətidir. O, səhmlərin 50,2 faizinə malikdir. Səhmlərin 49,8 faizi fiziki və hüquqi şəxslərə (o cümlədən banklara) məxsusdur.
İyunun 3-nə olan rəsmi məzənnə 0,7893 AZN/USD təşkil edir.
