Azərbaycan, Bakı, 20 iyun /Trend, müxbir N.İsmayılova/
2011-ci ilin aprel ayında Azərbaycan Mərkəzi Bankı (AMB) yanında Mərkəzləşdirilmiş Kredit Reyestri Xidmətinə ölkə banklarından 45 156 müraciət daxil olub. Bu barədə bazar ertəsi Trend-ə xidmətdən məlumat verilib.
2010-cu ilin analoji dövrü ilə müqayisədə xidmətə edilən müraciətlərin sayı 2,3 dəfə artıb. 2010-cu ilin aprelində sorğuların sayı 19 669 təşkil edib.
Cari ilin aprelində 109 nəfər xidmətə öz kredit hesabatını almaq məqsədilə müraciət edib.
2011-ci il aprelin sonuna olan məlumata görə, kredit reyestrində haqqında məlumat olan borcalanların sayı 1 044 161, kredit məlumatların ümumi sayı isə 1 064 521 təşkil edir. Reyestrdə olan zaminlər üzrə məlumatların sayı 491 341-dir.
Mərkəzləşdirilmiş Kredit Reyestri Xidməti 2005-ci ilin martından fəaliyyət göstərməyə başlayıb. Fiziki şəxslər üzrə bir sorğunun tarifi 1,1 manat, hüquqi şəxslər üçün iki manat təşkil edir. Kredit reyestri kommersiya məqsədləri daşımır, tariflər inzibati xərclərin ödənilməsi üçün tətbiq edilir.
İyunun 20-nə olan rəsmi məzənnə 0,7875 AZN/USD təşkil edir.
