Azərbaycan, Bakı, 25 iyun /Trend, müxbir E.İsmayılov/
İyunun 28-də Bakı-Tbilisi-Qars dəmiryol xəttinin yaradılması çərçivəsində Tetritskaro-Axalkalaki (Gürcüstan) dəmiryol hissəsinin tikintisi və bərpası üçün nəzərdə tutulan 575 milyon dollar həcmində kredit sazişinin imzalanması planlaşdırılır. Bu barədə şənbə günü Trend-ə Azərbaycan Nəqliyyat Nazirliyindəki mənbə bildirib.
Onun sözlərinə görə, kredit sazişi Azərbaycan Nəqliyyat Nazirliyi, Azərbaycan Beynəlxalq Bankı, ABB-nin Gürcüstandakı törəmə strukturu və "Kartsaxi-Marabda" MMC arasında imzalanacaq.
"Bakı-Tbilisi-Qars" layihəsinin həyata keçirilməsi sürətləndirilmiş templərlə aparılır, layihə çox vacibdir və ona görə də əlavə kredit haqqında qərar qəbul olunub. İyunun 28-də tərəflər arasında kredit sazişinin imzalanacağı gözlənilir", - mənbə deyib.
Bakı-Tbilisi-Qars dəmiryolunun Gürcüstan hissəsinin tikintisi üçün Azərbaycan Gürcüstana əlavə 575 milyon dollar ayırıb. Ayrılan vəsaitlər dəmiryolun Tetritskaro-Axalkalaki hissəsinin tikintisinə və bərpasına, Axalkalakidə dəmiryol vağzalının tikintisinə, eləcə də digər dəmiryol infrastrukturunun tikintisinə yönələcək.
Bu kredit "Kartsaxi-Marabda" şirkətinə ayrılıb və dövlət borcu deyil. Bu kredit dəmiryol işə salındıqdan sonra layihənin həyata keçirilməsindən əldə ediləcək gəlirdən qaytarılacaq.
Gürcüstan üçün 200 milyon dollar məbləğində birinci tranş da 25 il müddətinə, lakin illik bir faiz dərəcə ilə ayrılıb.
Azərbaycan və Gürcüstan hökumətləri arasında dəmiryolun Marabda-Türkiyə sərhədi (Kartsaxi) hissəsinin maliyyələşdirilməsi, layihələşdirilməsi, tikintisi və reabilitasiyası işlərinə dair sazişə edilən düzəlişlərə görə, kredit xəttinin ümumi həcmi 775 milyon dollar təşkil edir.
Bakı-Tbilisi-Qars dəmiryolunun Gürcüstan hissəsinin tikintisi və reabilitasiyasının maliyyələşdirilməsi Azərbaycan Respublikası Dövlət Neft Fondu tərəfindən həyata keçirilir.
Bakı-Tbilisi-Qars layihəsi çərçivəsində dəmiryol magistralının yeni 105 km.-lik qolunun tikintisi də planlaşdırılır. Bunun 76 km.-i Türkiyə, 29 km.-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda 183 km.-lik Axalkalaki-Marabda-Tbilisi dəmir yolunun 183 km.-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.
Bundan əvvəl Azərbaycanın nəqliyyat naziri Ziya Məmmədovun verdiyi məlumata görə, tikinti işlərinin 2012-ci ilin birinci yarısında başa çatdırılması planlaşdırılıb. Lakin layihənin həyata keçirilmə müddətinin razılaşdırılmasına baxmayaraq, tərəflər prosesin sürətləndirilməsi və işlərin böyük hissəsinin 2011-ci ilin sonunadək başa çatdırılması üzərində işləyirlər.
Dəhlizin yüksək buraxılış qabiliyyəti 17 milyon ton yük təşkil edəcək. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.
