Azərbaycan, Bakı, 4 avqust /Trend, müxbir N.İsmayılova/
2011-ci ilin iyun ayı ərzində Azərbaycanın bank sektorunun kapitallaşdırılması 0,9 faiz, 2010-cu ilin sonuna nisbətdə 4,6 faiz artaraq iyunun 1-nə 2 milyard 269,2 milyon manat təşkil edib. Bu barədə cümə axşamı Trend-ə Azərbaycan Mərkəzi Bankından bildirilib.
AMB-nin statistik məlumatlarına görə, kapitalı 10 milyon manatı ötən bankların sayı iyun ayının yekunları üzrə 41 ədəd təşkil edərək 2010-cu ilin sonu ilə müqayisədə 1 bank azalıb. İyunda bu kateqoriyalı bankların ölkənin bütün banklarının ümumi həcmində xüsusi çəkisi mayda və ilin əvvəlində olduğu kimi 98,9 faiz təşkil edib.
İki bankda (0,9 faiz xüsusi çəki ilə) kapital 5 milyon və 10 milyon manat arasında, bankın birində isə (0,2 faiz) 3,5 milyon manatdan 5 milyon manatadək formalaşıb.
İyulun 1-nə olan məlumata görə, Azərbaycan banklarının ümumi kapitalı 1 milyard 897,14 milyon manat təşkil edib. AMB-nin məlumatına görə, bank sisteminin ümumi kapitalının 45,66 faizi (866,33 milyon maant) ölkə banklarının ilk beşliyinin payına düşür. 6-15-ci yerləri tutan banklar ümumi kapitalın 25,3 faizini və ya 479,98 milyon manatı, 16-cı yerdən 30-cu yerədək olan banklar 337,32 milyon manatı (17,78 faiz) formalaşdırırlar.
31-ci yerdən 44-cü yerədək olan 16 bankın payına ümumi kapitalın həcminin 11,25 faizi (213,51 milyon manat) düşür.
Avqustun 4-nə olan rəsmi məzənnə 0,7864 AZN/USD təşkil edir.