Azərbaycan, Bakı, 7 sentyabr /Trend, müxbir A.Axundov/
Əmək və Əhalinin Sosial Müdafiəsi Nazirliyi ilin sonunadək 50 peşəkar standartın hazırlanmasını başa çatdıracaq. Trend-in məlumatına görə, bu barədə çərşənbə günü peşəkar standartların hazırlanması layihəsi rəhbərinin müavini İlkin Nəzərov Xəzər Avropa İnteqrasiya İşgüzar Klubu üzvlərinin turizmin inkişafına həsr olunmuş növbəti görüşündə deyib.
"Biz artıq həmin standartları hazırlamışıq, növbəti mərhələdə onların müvafiq dövlət strukturları ilə razılaşdırılması gözlənilir. İlin sonunadək onlar tamamilə razılaşdırılacaq ki, bundan sonra onların milli standartlar kimi təsdiq edilməsi mümkün olsun", - Nəzərov bildirib.
Onun sözlərinə görə, onlardan 14 standart tikinti, 12-si turizm, qalanları isə emal, energetika və kənd təsərrüfatı sahələrinə aiddir.
Nəzərov həmin sahələrdə işləyən şirkətləri bu standartları hazırlama işində nazirliklə sıx əməkdaşlıq etməyə çağırıb.
Peşəkar standartların hazırlanması Dünya Bankı ilə birlikdə 2010-cu ildə başlayan sosial müdafiənin inkişafı layihəsi çərçivəsində həyata keçirilir. Layihə gələcəkdə iqtisadiyyatın müxtəlif sahələrinə aid 200-ə yaxın peşəkar standartın hazırlanmasını da nəzərdə tutur. Layihənin tamamlanması 2013-cü ilə nəzərdə tutulub və onun müşaviri kimi GOPA Consultants beynəlxalq şirkəti iştirak edir.