Azərbaycan, Bakı, 4 noyabr /Trend, müxbir E.İsmayılov/
Bakı Metropolitenində yaradılan təhlükəsizlik sistemi MDB ölkələri arasında daha mükəmməl təhlükəsizlik sistemlərindən biridir. Trend-in məlumatına görə, bu barədə cümə günü Bakı Metropoliteninin rəisi Tağı Əhmədov "Metropoliten işçilərinin peşə bayramı günü"nə həsr edilmiş tədbirdə deyib.
Onun sözlərinə görə, bir çox MDB ölkələri hələ indi təhlükəsizlik sistemini təşkil etməyə və ona ciddi yanaşmağa başlayırlar. Halbuki təhlükəsizlik sistemi Azərbaycanda yüksək səviyyəyə çatıb.
Bakı Metropoliteninin rəisi bildirib ki, Bakı metrosunda təhlükəsizliyin təmin edilməsi çərçivəsində 3000-dən çox müşahidə kamerası quraşdırılıb.
"Bakı Metropolitenində təhlükəsizlik sisteminin təşkilinə 13 milyon manatdan çox vəsait xərclənib", - Əhmədov deyib.
Bakı Metropoliteni 1967-ci ildən fəaliyyət göstərir, 23 stansiyası var.