Azərbaycan, Bakı, 10 noyabr /Trend, müxbir N.İsmayılova/
Cümə günü Bakıda Macarıstan Prezidenti Pal Şmittin Azərbaycana səfəri çərçivəsində Azərbaycan-Macarıstan biznes forumu keçiriləcək. Trend-in məlumatına görə, bu barədə cümə axşamı Azərbaycan İxracın və İnvestisiyaların Təşviqi Fondundan (AZPROMO) bildirilib.
Forumda kənd təsərrüfatı və qida sənayesi, tikinti, sənaye, təhsil, konsaltinq, İKT, maliyyə və bank işi, səhiyyə, loqistika kimi sahələri təmsil edən şirkətlər iştirak edəcəklər.
Forumda iştirakla bağlı əlavə məlumat almaq üçün AZPROMO-ya müraciət etmək lazımdır. Əlaqələndirici şəxs Anar Nuriyev (tel.: 012 5980147/48 (123), e-mail: [email protected]).
Azərbaycan-Macarıstan biznes forumu sonuncu dəfə bu il fevralın sonlarında Bakıda keçirilib. Forum Azərbaycanın İqtisadi İnkişaf Nazirliyi, Azərbaycan İxracın və İnvestisiyaların Təşviqi Fondu (AZPROMO) və Macarıstanın Azərbaycandakı səfirliyi tərəfindən təşkil olunub. Azərbaycan tərəfdən forumda iqtisadiyyatın informasiya texnologiyaları, kənd təsərrüfatı, sənaye, nəqliyyat, tikinti kimi sahələrindən 60-a yaxın şirkət iştirak edib.
Dövlət Statistika Komitəsinin məlumatına görə, 2011-ci ilin yanvar-avqustunda iki ölkə arasında əmtəə mübadiləsi 13,12 milyon dollar təşkil edib ki, burada idxalın payı 13,115 milyon dollar olub.