Azərbaycan, Bakı, 10 noyabr /Trend, müxbir S.Ağayeva/
Azərbaycan ilə Yaponiya arasında ticari-iqtisadi əməkdaşlığın perspektivləri noyabrın 22-23-də Bakıda keçiriləcək Azərbaycan-Yaponiya birgə əməkdaşlıq komissiyasının növbəti iclası zamanı müzakirə olunacaq. Bu barədə Trend-ə cümə axşamı Azərbaycanın Tokiodakı səfirliyindən məlumat verilib.
İclasın gedişində Azərbaycanda enerji sektorunda həyata keçirilən infrastruktur layihələrdə, eləcə də sosial yönümlü layihələrdə Yaponiya şirkətlərinin iştirakının genişləndirilməsi imkanlarının müzakirəsi planlaşdırılır.
"Azərbaycan hökuməti infrastruktur və nəqliyyat sahələrində Yaponiyanın böyük təcrübəsini nəzərə alaraq, ölkədə yüksək sürətli qatarlar üçün dəmiryolların, asma körpülərin tikintisində Yaponiya şirkətlərinin iştirakını məqsəduyğun hesab edir", - bir az əvvəl Azərbaycanın Yaponiyadakı səfiri Gürsel İsmayılzadə Trend-ə müsahibəsində bildirib.
"Körpü, yol çəkilişi sahəsində yaponlar dünyada ən qabaqcıl təcrübə və biliklərə malikdirlər. Bunu nəzərə alaraq, artıq bir neçə Yaponiya şirkətinin nümayəndələrinin ölkəmizə səfəri təşkil edilib, aidiyyəti qurumlarda görüşlər keçirilib. Ümid edirik ki, yaxın gələcəkdə digər ölkələrin şirkətləri ilə yanaşı, Yaponiya şirkətləri də ölkəmizin infrastruktur layihələrində yaxından iştirak edəcəklər", - diplomat deyib.
Hər iki ölkənin hökumətləri qarşılıqlı mal dövriyyəsi həcminin artmasına da böyük diqqət ayırırlar.
Dövlət Statistika Komitəsinin məlumatına görə, 2011-ci ilin yanvar-sentyabrında iki ölkə arsında əmtəə mübadiləsi ötən ilin müvafiq dövrü ilə müqayisədə 22,7 faiz artaraq 125,6 milyon dollar təşkil edib.
