Azərbaycan, Bakı, 11 noyabr /Trend, müxbir N.İsmayılova/
2011-ci ilin 9 ayında Azərbaycan Mərkəzi Bankı (AMB) antiinflyasion xarakterli siyasət həyata keçirib. Trend-in məlumatına görə, bu barədə cümə günü AMB-nin dərc etdiyi pul siyasəti icmalında deyilir.
"Hesabat dövründə dünya bazarında ərzaq məhsullarının bahalaşması, ölkənin valyuta gəlirlərinin çoxalması, dövlət tələbinin yüksəlməsi ilə bağlı pul kütləsinin artım mənbələrinin genişlənməsi və qeyri-neft sektorunda artımın sürətlənməsi gözləntiləri inflyasiya amillərinə nəzarətin gücləndirilməsi və onların preventiv rejimdə tənzimlənməsini yenidən aktuallaşdırıb", - icmalda deyilir.
Müəyyən edilmiş pul siyasəti istiqamətinə uyğun olaraq sterilizasiya əməliyyatlarının aktivləşdirilməsi çərçivəsində 2011-ci ilin ilk 9 ayı ərzində 987 milyon manat məbləğində not emissiya olunub.
Bundan 617 milyon manatlıq not hərraclara çıxarılıb və 519.7 milyon manatlıq not yerləşdirilib. Son hərracda notlar üzrə orta gəlirlik 2.72% təşkil edib, halbuki ilin əvvəlində bu göstərici 2.20% səviyyəsində olub.
Oktyabrın 1-nə dövriyyədə olan notların həcmi 14 milyon manat olub.
Noyabrın 11-nə olan rəsmi məzənnə 0,7866 AZN/USD təşkil edib.