Azərbaycan, Bakı, 14 noyabr /Trend, müxbir N.İsmayılova/
Avropa Yenidənqurma və İnkişaf Bankı (AYİB) Azərbaycan bankı "AccessBank"a yerli mikro, kiçik və orta müəssisələr üçün (MKOM) maliyyələşdirməyə çıxışın genişləndirilməsi məqsədilə 25 milyon dollar məbləğində vəsait ayırıb. Trend-in məlumatına görə, bu barədə bazar ertəsi AYİB-in saytında dərc olunmuş məlumatda deyilir.
AYİB krediti iki tranşda (15 milyon dollar və 10 milyon dollar) verməyi planlaşdırır. Kredit iki illik güzəştli dövrlə beş illiyə verilir.
Bankın Direktorlar Şurası dekabrın 13-də Azərbaycan bankına kreditin verilməsi məsələsinə baxacaq.
"Sövdələşmə ölkədə, xüsusilə də Bakının hüdudlarından kənarda kreditləşmənin genişlənməsi üçün inkişaf və dəstəyi stimullaşdırır", - məlumatda bildirilir.
Maliyyə vəsaitinin verilməsində əsas məqsəd maliyyə vasitəçiliyinin artırılması və MKOM-in maliyyələşdirilməsinə çıxış, gələcəkdə kənd təsərrüfatı krediti məhsullarının artımı, təcrübənin ötürülməsi hesabına bazarın genişləndirilməsidir.
"Azərbaycanda tamamilə MKOM maliyyə xidmətlərinin göstərilməsinə cəmləşmiş yeganə kommersiya bankı kimi "AccessBank" digər yerli banklara xeyli təsirə malikdir", - məlumatda deyilir.
AccessBank-ın missiyası Azərbaycanda mikro və kiçik biznesmenlərin, eləcə də aşağı və orta gəlirli ailələrin maliyyə xidmətlərindən istifadə etmələrinə imkan yaratmaqdan ibarətdir. AccessBank "Fitch" beynəlxalq reytinq agentliyi tərəfindən Azərbaycanın özəl bankları arasında ən etibarlı bank elan edilib (BB+). Bundan əlavə, 2011-ci ildə "Global Finance" jurnalı, 2010-cu və 2011-ci illərdə isə "Euromoney" Nəşriyyat Qrupu tərəfindən "Azərbaycanın ən yaxşı bankı" adınа layiq görülüb.
AccessBank 100 faiz xarici kapitala malikdir və 6 beynəlxalq maliyyə institutuna məxsusdur. Bunlar Avropa Yenidənqurma və İnkişaf Bankı, Beynəlxalq Maliyyə Korporasiyası, Qara dəniz Ticarət və İnkişaf Bankı, Kfw Development Bank - Almaniya Hökumətinin İnkişaf Bankı (hərəsi 20 faiz), mikromaliyyələşdirmə sahəsində strateji maliyyəçi rolunda çıxış edən Access Holding (16.5 faiz) və Almaniyanın LFS Financial Systems GmbH (3.5 faiz) şirkətləridir.