Azərbaycan, Bakı, 30 noyabr /Trend, müxbir N.İsmayılova/
Azərbaycan hökuməti və Dünya Bankı (DB) "Azərbaycan kənd investisiyaları"nın (AzRIP) ikinci layihəsinin konsepsiyasının hazırlanmasını 2012-ci ilin birinci rübündə başa çatdıracaq. Bu barədə çərşənbə günü Trend-ə bankın Bakı nümayəndəliyindən məlumat veriblər.
"AzRIP-in ikinci layihəsi birincinin davamı olacaq. Lakin hazırda bu layihənin idarə edilməsi strukturunun müzakirəsi aparılır ki, buna da vaxt lazımdır. Gözlənilir ki, gələn ilin əvvəlində konsepsiyanın hazırlanması başa çatacaq", - nümayəndəlikdən bildiriblər.
AzRIP layihəsinin həyata keçirilməsinə dair kredit müqaviləsi 2004-cü il sentyabrın 23-də imzalanıb, 2004-cü il dekabrın 29-da qüvvəyə minib. Layihənin ümumi dəyəri 21,1 milyon dollar təşkil edir ki, bunun da 15 milyon dolları Beynəlxalq İnkişaf Assosiasiyasının, 3,3 milyon dolları Yaponiya hökumətinin qrantının, qalan hissəsi isə hökumətin payına (1,250 milyon dollar) düşür.
2010-cu ilin aprelində AzRIP layihəsinin ümumi məbləği 25,56 milyon dollar olan əlavə maliyyələşdirilməsi üzrə kredit sazişi imzalanıb.
