Azərbaycan, Bakı, 19 yanvar / Trend müxbir T.Cəfərov/
Son bir həftə ərzində Azərbaycan vətəndaşlarının Astara sərhəd keçid məntəqəsindən gediş-gəlişi artıb və orta hesabla, gündə 500 nəfər gediş gəliş edir. Bunu İranın Astara şəhər İcra Hakimiyyətinin Sərhəddə gediş-gəlişə nəzarət şöbəsinin rəhbəri Tovfiq Abbasqulizadə deyib. Trend-in məlumatına görə, bu barədə İRNA xəbər agentliyi məlumat verir.
Abbasqulizadə bildirib ki, bundan öncə sutkada 300 nəfər Astara keçid məntəqəsindən keçərək İran ərazisinə daxil ola bilirdi. Onlar İran Astarasında alış-veriş edib ölkələrinə qayıdırdı. Lakin hazırda bu məqsədlə İrana gələnlərin sayı artıb.
Onun sözlərinə görə, son bir həftə ərzində Astara keçid məntəqəsindən 3849 nəfər Azərbaycanlı İrana daxil olub, 4016 nəfər isə İslam Respublikasını tərk edib.
"Bundan başqa portfel ticarəti məqsədilə İran Astarasına səfər edən vətəndaşlar üçün də məhdudiyyətlər yoxdur, onlar istədikləri məhsulu alaraq ölkələrinə apara bilərlər", - Abbasqulizadə deyib.
Onun sözlərinə görə, cari ilin 9 ayı ərzində (iranda il martın 21-də dəyişir) Astara sərhəd keçid məntəqəsi vasitəsi ilə 22 milyon dollar dəyərində məhsul (portfel ticarəti vasitəsilə) Azərbaycana ixrac olunub.
İran Azərbaycan vətəndaşları üçün viza rejimini birtərəfli qaydada ləğv edib. 2010-cu il fevralın 1-dən etibarən İrana gedən Azərbaycan vətəndaşlarından viza tələb olunmur.
