Azərbaycan, Bakı, 14 mart /Trend, müxbir A.Axundov/
2012-ci ilin yanvar ayı ərzində Azərbaycanın bank sektorunun kapitallaşması 1,2 faiz artıb. Kapitallaşma 2011-ci ilin yanvarına nisbətən 12,67 faiz artaraq 2012-ci il fevralın 1-nə 2456,8 milyon manat təşkil edib. Trend-in məlumatına görə, bu barədə çərşənbə günü Azərbaycan Mərkəzi Bankının (AMB) statistik hesabatında qeyd edilir.
AMB-nin məlumatına görə, kapitalı 10 milyon manatdan çox olan bankların sayı yanvarın yekunları üzrə 42 ədəd təşkil edib. Bu göstərici əvvəlki aylara və 2011-ci ilin yanvar ayı ilə müqayisədə dəyişməz qalıb. Ölkənin bütün banklarının ümumi kapital həcmində bu kateqoriyadan olan bankların xüsusi çəkisi yanvar ayında 99,5 faiz təşkil edib. Dekabrda bu rəqəm 99,4 faiz, ötən ilin yanvarında isə 98,9 faiz olub.
Hazırda kapitallaşma (minimum kapital 10 milyon manat təşkil etməlidir) üzrə AMB-nin tələblərini 2 bank yerinə yetirmir. Bir bankın (xüsusi çəkisi 0,3 faiz) kapitalı 5-10 milyon manat, digərinin (0,2 faiz) isə 3,5-5 milyon manat çərçivəsində formalaşıb.
