Azərbaycan, Bakı, 13 iyun /Trend, müxbir A.Axundov/
Nəqliyyat Nazirliyi "Azəryolservis" ASC 2012-ci ildə ölkədə yeni yol-nəqliyyat infrastrukturunun yaradılması və köhnəsinin yenidən qurulmasına 1,2 milyard manat ayırmağı planlaşdırır. Bu barədə çərşənbə günü Trend-ə ASC-dən bildiriblər.
"Bu məbləğ təqribən 2011-ci ildəki səviyyəyə bərabərdir və 2003-cü ildəki investisiyaların həcmini 17 dəfə üstələyir", - ASC-dən deyiblər.
Bu məbləğdən 800 milyon manatı dövlət büdcəsinin vəsaitləri hesabına təmin etmək planlaşdırılır, 400 milyon manat isə beynəlxalq maliyyə institutları ilə layihə çərçivəsində cəlb edilib.
"Dövlət büdcəsindən vəsaitlər, əsasən, Bakı şəhəri və ölkənin bölgələrində yol və yolayrıcıların yenidən qurulması və tikintisinə ayrılır. Beynəlxalq bankların vəsaitləri isə Gürcüstan, İran və başqa ölkələrin sərhədlərinədək beynəlxalq avtomagistralların tikintisi üçün istifadə edilir", - ASC-dən qeyd ediblər.
Məlumata əsasən, hazırda 2012-ci il üçün nəzərdə tutulan vəsaitlərin artıq təqribən 30-40 faizi xərclənib.
