Azərbaycan, Bakı, 4 avqust /Trend, müxbir E.İsmayılov/
Əmlak Məsələləri Dövlət Komitəsi şüşə lif istehsalçısı "Mingəçevir Texniki Rezin" SC-nin səhmlərinin 98,94 faizinin satışı üzrə investisiya müsabiqəsi elan edib. Trend-in məlumatına görə, bu barədə şənbə günü rəsmi mətbuatda dərc edilən məlumatda deyilir.
Müəssisənin satışa çıxarılan səhmlərinin 85 faizi investisiya müsabiqəsi üçün standart paketin, 13,94 faizi isə əmək kollektivinə səhmlərin güzəştli satışından sonra qalıb.
Müsabiqədə yerli fiziki və hüquqi şəxslər və xarici investorlar iştirak edə bilərlər.
İddiaçılar yeni texnologiyaların tətbiqi, məhsul çeşidinin və keyfiyyətinin artırılması, yeni iş yerlərinin yaradılması üzrə təkliflərdən ibarət investisiya proqramını təqdim etməlidirlər.
İddiaçılar investisiya təkliflərinin dəyərinin 5 faizi məbləğində bank zəmanətini təqdim etməli və 450 min manat məbləğində vəsaiti dövlət büdcəsinə köçürməlidirlər.
"Mingəçevir Texniki Rezin" SC texniki rezin istehsalı və satışı ilə məşğul olur. Müəssisə 1971-ci ildə istismara verilib.
