Azərbaycan, Bakı, 2 noyabr /Trend, müxbir C.Nəsibova/
Azərbaycan Mərkəzi Bankı (AMB) yanında fəaliyyət göstərən Azərbaycan İpoteka Fondunun (AİF) xətti ilə 2012-ci ilin yanvar-oktyabr aylarında 74,68 milyon manat (95 milyon dollardan çox) məbləğində kredit verilib. Trend-in məlumatına görə, bu barədə cümə günü AİF-in saytında dərc edilən statistik hesabatda deyilir.
2012-ci ilin yanvar-oktyabr ayları ərzində bankların əvvəllər ayırdığı kreditlərin yenidən maliyyələşməsinin ümumi həcmi 50,6 milyon manat təşkil edib.
Bu ilin on ayı ərzində AİF 23 milyon manat həcmində istiqrazlar yerləşdirib.
AİF-in xətti ilə maliyyələşdirməyə başlanandan - 2006-cı ildən 2012-ci ilə qədər 420 milyon manatdan çox ipoteka krediti ayrılıb.
Ayrılan kreditlərin ümumi həcmindən gənclərə və gənc ailələrin payına 72 faiz düşür (borcalanların 41 faizi 18-29 yaşında, 31 faizi 30-35 yaşındadır). Kreditlərin 28 faizi isə yaşı 36-dan çox olan borcalanların payına düşür.