Azərbaycan, Bakı, 20 noyabr /Trend, müxbir İ.Xəlilova/
"Azərbaycan-Avropa İttifaqı" Əməkdaşlıq Komitəsinin növbəti iclası noyabrın 22-də Brüsseldə keçiriləcək. Bu barədə çərşənbə axşamı Trend-ə xarici işlər nazirinin müavini Mahmud Məmmədquliyev bildirib.
Komitənin iclasında Avropa Qonşuluq Siyasəti (ENPI) və "Şərq tərəfdaşlığı" çərçivəsində əməkdaşlığın aktual məsələləri müzakirə olunacaq.
"Komitənin iclasında Azərbaycanla Avropa İttifaqı arasında assosiativ saziş üzrə danışıqlar prosesinin vəziyyətinin müzakirə ediləcəyi gözlənilir. Belə ki, artıq bir neçə aydır görüşlər və videokonfranslar keçirilmir və Avropa İttifaqı öhdəlikləri yerinə yetirmir", - nazir müavini bildirib.
Aİ ilə əldə olunan razılığa görə, Azərbaycan tərəfi Avropa Komissiyasının hazırladığı sənədlər əsasında işləyir.
"Biz Aİ-dən sualların yenilənmiş mətnini gözləyirik, yəni bizə hələ razılığın əldə olunmadığı məsələlər üzrə sənədlər göndərilməlidir. Amma onlar bunu etmirlər, ekspertlərin olmaması, qrafikin yüklənməsi ilə izah edirlər", - Məmmədquliyev deyib.
Məmmədquliyevin sözlərinə görə, Azərbaycan üçün Avropa İttifaqı ilə daha uzunmüddətli əməkdaşlıq üzrə ölkənin fəaliyyətinin bütün aspektlərini əhatə edəcək keyfiyyətli sənədin hazırlanması çox əhəmiyyətlidir. Buna görə də assosiativ sazişin imzalanacağı mümkün tarixi açıqlamaq çox çətindir.