Azərbaycan, Bakı, 29 noyabr /Trend, müxbir C.Nəsibova/
"Daşınmaz əmlakın qeydiyyatı" layihəsinin icmalı məqsədilə layihə rəhbəri Qevin Adlinqtonun başçılığı ilə Dünya Bankının (DB) missiyası Bakıya gələcək. Bu barədə cümə axşamı Trend-ə bankın Bakı nümayəndəliyindən məlumat veriblər.
Missiya layihənin həyata keçirilməsinin monitorinqini aparmaq məqsədilə cari il dekabrın 1-5-də ölkədə olacaq. DB layihənin yenidən strukturlaşdırılmasını aparıb və hazırda bankın kredit vəsaiti hesabına həyata keçirilməsi planlaşdırılan müəyyən işlər layihədə iştirak payı qismində dövlətin ayırdığı vəsaitlərin qalan hissəsi hesabına maliyyələşdiriləcək.
Bu işlərə kadastr xəritələrinin yaradılması da aiddir.
2008-2012-ci illərə hesablanmış layihənin yenidən strukturlaşdırılması nəticəsində bu müddət 2014-cü ilədək uzadılıb.
DB missiyasının səfəri çərçivəsində Əmlak Məsələləri Dövlət Komitəsində görüşlərin keçirilməsi nəzərdə tutulub.
