Azərbaycan, Bakı, 6 dekabr /Trend, müxbir A.Axundov/
Azərbaycan mallarının iri idxalçısı olan İtaliya Azərbaycanda ixracatçı dövlətlərin dördlüyünə daxil olmaq fikrindədir.
Bu barədə İtaliyanın Azərbaycandakı səfiri Mario Baldi cümə axşamı Azərbaycan-İtaliya biznes forumunda çıxış edərkən bildirib.
"Biz indi Azərbaycanın ixracatçı ölkələri arasında doqquzuncu yerdəyik, amma məhsullarımızın ixracını artırmaq üçün bütün imkanlar var", - Baldi deyib.
İtaliya Azərbaycanın ən böyük ticarət tərəfdaşıdır, Azərbaycanın xarici ticarətinin 35 faizi bu ölkəyə ixrac olunur. 2012-ci ildə iki ölkə arasında əmtəə dövriyyəsi 9,6 milyard dollar təşkil edib ki, bunun çox hissəsi İtaliyaya neft və neft məhsullarının ixracının hesabına təmin edilib.
Baldinin sözlərinə görə, 2011-ci ildə İtaliya səfirliyi vizaların verilməsini 70 faiz artırıb, 2013-cü ildə 7-8 min viza verilməsi planlaşdırılır.
Azərbaycanın İtaliyadakı səfiri Vaqif Sadıqovun sözlərinə görə, Azərbaycan əmtəə dövriyyəsi strukturunda qeyri-neft sektorunun payının artmasında maraqlıdır.
"Səfirliyin əməkdaşları İtaliyanın regionlarına baş çəkir və işgüzar dairələrin nümayəndələri ilə görüşürlər, onlarla Azərbaycanda işləmək imkanlarından danışırlar. İtaliyanın ən inkişaf etmiş regionlarından olan sahibkarlar ən yaxın aylarda Azərbaycana baş çəkməyə hazır olduqlarını bildiriblər", - Sadıqov deyib.
