Azərbaycan, Bakı, 13 dekabr /Trend, müxbir A.Axundov/
Asiya İnkişaf Bankı (AİB) 2013-cü ildə Azərbaycan iqtisadiyyatının təqribən 2 faiz səviyyəsində artacağını proqnozlaşdırır.
Trend-in məlumatına görə, bu barədə cümə axşamı bankın Bakı nümayəndəliyinin iqtisadçısı Nail Vəliyev mətbuat konfransında deyib.
"Asian Development Outlook Supplement" bankının dekabrda dərc edilən hesabatında 2012-ci ilin sonuna Asiyada iqtisadi artım proqnozu əvvəl müəyyən edilən 6,2 faizdən 6 faizə enidirilib. 2013-cü ildə artımın 6,6 faiz səviyyəsində olacağı gözlənilir. Bu il inflyasiya 5,4 faiz, 2013-cü ildə isə 6,5 faiz proqnozlaşdırılır. Azərbaycana gəlincə, ölkədə neft hasilatı həcminin azalması nəzərə alınmaqla gələn il təqribən 2 faiz səviyyəsində artım gözləyirik", - Vəliyev qeyd edib.
Onun sözlərinə görə, bankın gələn il üçün makroiqtisadi göstəricilər üzrə proqnozları hələ hazırlanmayıb və 2013-cü ilin əvvəlində dərc ediləcək.