Azərbaycan, Bakı, 14 dekabr /Trend, müxbir A.Abbasov/
2012-ci ilin yanvar-sentyabr aylarında Azərbaycanda cari transfertlər üzrə xarici ölkələrlə aparılan əməliyyatların ümumi dəyəri 2,8 milyard dollar məbləğində qiymətləndirilib. Bu məbləğin 46,8 faizini ölkəyə daxilolmalar təşkil edib. Trend-in məlumatına görə, bu barədə Azərbaycan Mərkəzi Bankının tədiyyə balansında deyilir.
Cari transfertlər üzrə ümumi daxilolmaların 94,4 faizi xarici ölkələrdən fiziki şəxslərin pul baratları, 1,9 faizini ölkəyə gətirilən humanitar idxal mallarının dəyəri, 3,7 faizini isə digər daxilolmalar təşkil edib.
Bütövlükdə, cari transfertlər üzrə əməliyyatların saldosu mənfi 178,9 milyon dollar olub.
Hesabat dövründə gəlirlər üzrə daxilolmaların və ödənişlərin ümumi dövriyyəsi 5,1 milyard dollara çatıb. Bunun 83,3 faizini (4,3 milyard dollar) Azərbaycandan ödənişlər təşkil edib. Bu məbləğin isə əsas hissəsini (3,3 milyard dollar) beynəlxalq neft-qaz konsorsiumları üzrə xarici investorların payına düşən gəlirlərin repatriasiyası (əsasən xam neft şəklində), qeyri-rezidentlərə ödənilmiş əməkhaqları (133 milyon dollar) və xarici kreditlərdən istifadəyə görə ödənilən faizlər (231,4 milyon dollar) təşkil edib.