Azərbaycan, Bakı, 29 aprel /Trend, müxbir A.Axundov/
"YapıKredi Bank Azerbaijan" bir il ərzində internet bankçılığın tam tətbiqini başa çatdırmağı planlaşdırır. Bu barədə Trend-ə bazar ertəsi bankın İdarə heyətinin sədri Altan Şəntürk deyib.
"Biz 2014-cü il yanvarın sonuna internet bankçılığın tam tətbiqini başa çatdırmağı planlaşdırırıq ki, bu da bizə bütün xidmətləri onlayn-rejimdə təqdim etməyə imkan verəcək. Bununla da internet bankçılığı 100 faiz tətbiq edən ilk bank olacağıq. Bu layihə mobil bankçılığın inkişafını da əhatə edir", - Şəntürk qeyd edib.
Onun sözlərinə görə, bank 2013-cü ilin sonuna öz aktivlərinin həcmini indiki 332 milyon dollardan 400 milyon dollaradək çatdırmağı planlaşdırır.
"Bankın kredit portfeli hazırda 200 milyon dollara bərabərdir, ilin sonunadək biz portfeli 330 milyon dollara çatdırmağı planlaşdırırıq. Biz korporativ sektorun kreditləşməsinə və istehlak kreditlərinə, xüsusilə, avtomobil kreditləşməsinə köklənmişik", - Şəntürk deyib.
Onun sözlərinə görə, "YapıKredi Bank Azerbaijan" nizamnamə kapitalı Mərkəzi Bankın 50 milyon manat (63,7 milyon dollar) həcmi ilə bağlı yeni tələbinə cavab verən 9 bankdan biridir.
"Hazırda bankın nizamnamə kapitalı 78 milyon dollar səviyyəsindədir. Biz diqqəti artıma yönəltmişik. Ötən il 12 filialımız olub, hazırda onların sayı 14-dür, ilin sonuna isə filialların sayını 17-ə çatdırmağı planlaşdırırıq", - Şəntürk bildirib.
